Arrinca a Rede Galega de Educación Dixital

Conta cun equipo integrado por 78 centros educativos e outros tantos docentes para impulsar a transformación do sistema educativo.

Por E.P. | Santiago de Compostela | 15/11/2021 | Actualizada ás 15:16

Comparte esta noticia

A Rede Galega de Educación Dixital inicia a súa actividade cun equipo integrado por 78 centros educativos e outros tantos docentes para impulsar a transformación do sistema educativo e ofrecer asesoramento e apoio no impulso dunha medida clave neste proceso: o plan dixital de centro.

Acto de constitución da Rede Galega de Educación Dixital
Acto de constitución da Rede Galega de Educación Dixital | Fonte: Conchi Paz - Xunta de Galicia.

O conselleiro de Cultura, Educación e Universidade, Román Rodríguez, e a directora da Axencia para a Modernización Tecnolóxica (Amtega), Mar Pereira, presidiron este luns o acto de constitución desta rede de 'mentores' que prestarán ese apoio aos centros da súa área de influencia.

Para iso contratáronse 78 docentes especialistas no ámbito dixital que acompañarán aos centros educativos no proceso de deseño, elaboración e implementación do seu Plan Dixital, que deberá estar totalmente operativo o próximo curso.

Á súa vez estes 78 docentes estarán organizados en 26 equipos de atención dixital aos centros estruturados en 14 ámbitos xeográficos: cinco na provincia da Coruña, dous na de Lugo, dous na de Ourense e outros cinco na de Pontevedra.

Os centros deberán comezar coas primeiras fases de elaboración este curso, partindo dunha análise da situación real e de diagnose de debilidades, ameazas e fortalezas para a súa aprobación definitiva polos respectivos consellos escolares a finais de curso.

A previsión é que o documento estea totalmente pechado para a súa aplicación efectiva no próximo curso 2022-23.

O titular de Educación incidiu en que esta rede representa "un novo paso" na aposta "moi potente" da implantación e desenvolvemento das novas tecnoloxías no sistema, pero que necesita dunha "implicación e complicidade forte" dos centros.

"Un conglomerado de accións que nos fan estar á vangarda de España neste ámbito", destacou, e que agora se potenciará co novo plan dixital de centros que será "o eixo vertebral" das accións nesta materia.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta