A Xunta presume de sanidade cuns datos anteriores ao estalido de protestas pola saturación
Aseguran que as cirurxías contan cunha espera media de 70 días, datos rexistrados no pasado mes de xuño.
Por Europa Press / Redacción | SANTIAGO DE COMPOSTELA | 17/11/2021 | Actualizada ás 13:57
Galicia sitúase como segunda comunidade autónoma con mellores datos de lista de espera cirúrxica dentro do sistema sanitario español, con 70 días de demora media ao peche do primeiro semestre de 2021, só por detrás de País Vasco, con 62 xornadas.
Así o destacou este mércores nun comunicado de prensa a Consellería de Sanidade en relación ao informe que publica o Ministerio de Sanidade relativo ao primeiro semestre deste ano, no que se reflicte que o tempo medio de espera para unha intervención cirúrxica en España ascende a 121 días, o que supón 51 máis que a demora no Servizo Galego de Saúde.
O último informe emitido polo Sistema de Información sobre Listas de Espera do Sistema Nacional de Saúde reflicte que no primeiro semestre de 2021 había 19.327 persoas en lista de espera para unha intervención cirúrxica no País Vasco cunha demora media de 62, mentres que no caso de Galicia ascendían a 40.316 os pacientes con 70 xornadas de espera.
Con respecto á media de España, había 661.162 pacientes en espera dunha operación, cunha taxa de 14,45 por mil habitantes e un 18,9% que agardaban máis de seis meses. No caso de Galicia, a taxa reduciuse a 15,4 pacientes por mil habitantes e cunha porcentaxe de 5,5% de persoas que esperaban máis de seis meses para unha intervención cirúrxica.
A Consellería de Sanidade destaca respecto diso que Galicia, en canto á porcentaxe de pacientes que esperan máis de seis meses para unha intervención, "é o segundo territorio nacional cos mellores datos", co 5,5% dos pacientes, de novo por detrás do País Vasco, co 4%.
A comunicación da Xunta de Galicia chega nun momento en que a xestión sanitaria da banda do goberno do PP está a recibir fortes críticas polas esperas para recibir unha cita en atención primaria e a situación de saturación que se sofre. A Consellería de Sanidade apunta á ausenza de médicos, pero dende os sindicatos subliñan que esta se debe ás propias políticas da Xunta, dende os denunciados contratos "basura" á baixa taxa de reposición de persoal xubilado.
