Por Galicia Confidencial | SANTIAGO DE COMPOSTELA | 18/11/2021 | Actualizada ás 14:30
Punto e final a un dos principais proxectos que ameazaba a paisaxe de Mazaricos. O Tribunal Supremo vén de desestimar o recurso da empresa promotora dun parque despois de que o TSXG paralizara a concesión da licencia administrativa en favor dos intereses da veciñanza do municipio coruñés. A decisión vén de ser celebrada polo rexedor local, Juan Blanco (BNG), que destacou a súa oposición a que Mazaricos troque "nunha 'colonia'".
O rexedor apuntou, nun comunicado feito público este xoves, que a decisión do Supremo vai na liña do agardando dende o consistorio. De igual forma, asegura que "van seguir traballando" para evitar que se produzan "esta clase de abusos" que imputa a parte dos promotores eólicos que actúan en Galicia. “Non imos permitir que ningunha empresa veña aquí con prepotencia, malos modos ou amedrentando aos veciños”, asevera o alcalde.
Blanco reitera que o concello "non está en contra da enerxía eólica”, pero que non dubidará en defender "por riba de toda consideración" os dereitos da veciñanza que se vexan "conculcados". É por iso que dende o Concello están a impulsarse tamén alegacións ao proxecto de Parque Eólico A Picota, que se atopa xa en fase de exposición pública e que Juan Blanco define como “auténtico despropósito”.
“Imos movernos en todo momento procurando o benestar dos nosos veciños e asegurándonos de que non se producen abusos dende as empresas eólicas, nin ameazas para forzar ás persoas propietarias a desfacerse dos seus terreos a baixo prezo baixo ameaza de expropiación”, asegura o alcalde. “Non imos permitir que se converta Mazaricos nunha 'colonia' na que se explote o territorio pisoteando aos seus habitantes e os seus dereitos, cargándonos de todos os custes ambientais e sen ningunha clase de compensación no municipio”, enfatiza.
"Esta decisión do Supremo", inciden dende o ente local, "vén apoiar a tese do Concello: a de que non se pode, coa lei de montes na man, emprazar o parque na ubicación prevista. A finais de 2020, o Concello e a Comunidade de Montes de Porrei, así como varios veciños a título invidual, solicitaron a paralización cautelar da licenza que Eurus estaba a tramitar. A ubicación prevista pola empresa era en terros de Arcos e Colúns, en zonas que, debido ao feito de ter sufrido incendios forestais nas últimas décadas, non podían ser destinadas ao aproveitamento eólico".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.