Propoñen que o alumnado adquira na escola habilidades para o traballo doméstico
Esta é a proposta presentada pola Federación de Ensino de CCOO e UGT.
Por Europa Press / Redacción | MADRID | 18/11/2021 | Actualizada ás 18:10
A Comisión Permanente do Consello Escolar do Estado analizou este xoves o proxecto de real decreto polo que se establece a ordenación e os ensinos mínimos da Educación primaria, e pediu ao Goberno que inclúa nesta norma un novo obxectivo que debera alcanzar o alumnado nesta etapa. Trátase de "adquirir habilidades para o traballo doméstico que lles permitan gañar autonomía e valorar estas actividades", proposta presentada pola Federación de Ensino de CCOO.
Durante a reunión, a Comisión Permanente do Consello Escolar do Estado analizou un total de 271 emendas, das cales foron aprobadas todas menos unha decena. Outras das propostas aprobadas van encamiñadas a reforzar nos menores de 6 a 12 anos a corresponsabilidade --o proxecto non recolle ningunha mención a este termo-- e os traballos relacionados cos coidados.
O Consello Escolar do Estado reclama a inclusión desta terminoloxía en varios apartados do proxecto, como no relativo aos fins (art. 4), as competencias que ha de adquirir o alumnado (dentro da competencia cidadá), os saberes básicos da etapa, no que respecta á materia de Educación en Valores Cívicos e Éticos ou nas Situacións de Aprendizaxe (Anexo III).
"As situacións de aprendizaxe deben fomentar aspectos relacionados co interese común, a corresponsabilidade no coidado das persoas, a sustentabilidade ou a convivencia democrática, esenciais para que o alumnado se prepare para responder con eficacia aos retos do século XXI". Este é un dos exemplos, a iniciativa de FECCOO e UGT, do redactado proposto polo Consello, que será remitido ao Ministerio para a súa valoración.
