Feijóo esgrime que Galicia é "vangarda" na igualdade porque a Xunta ten máis de 64.000 empregadas públicas
O presidente da Xunta considera un logro que o seu Goberno conte con cinco mulleres á fronte das 11 consellerías que o compoñen.
Por Europa Press / Redacción | SANTIAGO DE COMPOSTELA | 18/11/2021 | Actualizada ás 19:25
Máis de 64.000 dos 89.774 empregados públicos cos que conta a Xunta de Galicia son mulleres, cifra que representa o 71% do funcionariado. Así o destacou este xoves o presidente do Goberno galego, Alberto Núñez Feijóo, durante a súa participación por vídeo na inauguración en Santiago de Compostela do III Congreso da Asociación de Mulleres no Sector Público.
Na súa intervención, da que informou a Xunta nun comunicado, Feijóo situou a Galicia na vangarda da igualdade polo seu compromiso para acabar cos desequilibrios.
Así mesmo, incidiu na importancia da función pública como elemento catalizador para a entrada e permanencia das mulleres no mercado laboral e dixo que as desigualdades entre homes e mulleres "son menos no mundo público que no privado".
"En Galicia integramos a igualdade como valor propio", afirmou o presidente galego, que lembrou que, na actualidade, o seu Goberno conta con cinco mulleres á fronte das 11 consellerías que o compoñen. Ademais, indicou que as direccións xerais de tres consellerías teñen á fronte mulleres e que a metade das 64 secretarías xerais e direccións xerais están lideradas por mulleres.
Deste xeito, o presidente da Xunta sinalou que a Comunidade galega é referente na súa aposta pola eliminación das fendas de xénero, ao activar neste 2021 o plan de igualdade do Servizo Galego de Saúde (Sergas), con 59 medidas para corrixir posibles desequilibrios, e ter avanzado un plan para toda a Administración autonómica que, co consenso das organizacións sindicais, sirva de paraugas de todas as actuacións desenvolvidas na materia no ámbito público.
"ADMINISTRACIÓN RESILENTE E PRODUTIVA"
No acto, a conselleira de Emprego e Igualdade, María Jesús Lorenzana, afirmou que a igualdade é un "alicerce imprescindible" para lograr "unha administración resilente e produtiva, que sirva como modelo de gobernación para unha sociedade inclusiva, tolerante, saudable e cun alto índice de benestar laboral".
Ademais, explicou que a Xunta leva a cabo a reforma integral da Lei de igualdade autonómica con vistas á tranformación do mercado laboral. O obxectivo é crear un novo marco legal que destacará pola visibilización da discriminación múltiple, as medidas para romper os teitos de cristal ou a posta en marcha de iniciativas para alcanzar o benestar laboral da muller.
"Será unha reforma de calado, que impulsará a independencia económica das mulleres e o seu desenvolvemento profesional, e que concienciará ao tecido empresarial e guiará ás súas boas prácticas", sinalou a titular de Igualdade, que apuntado que, no ámbito do emprego público, a Xunta reforzará o compromiso da formación en igualdade "elevando a súa regulación a rango legal" e realizará "un maior control da composición equilibrada do persoal ao servizo da Administración autonómica".
