Xunta esixe ao Goberno "actuar" na súa liña "pioneira" para compensar a construtores afectados pola crise
O sector agradece este "bo agasallo antes de nadal" que ve "importante" para a sustentabilidade das empresas.
Por Europa Press / Redacción | SANTIAGO DE COMPOSTELA | 19/11/2021 | Actualizada ás 12:10
A conselleira de Infraestruturas, Ethel Vázquez, considera "imprescindible" que o Ministerio de Transportes actúe na liña da medida lexislativa "pioneira en Galicia" pola cal o Goberno galego compensará a construtores que se vexan afectados pola crise de subministración de materiais.
Pola súa banda, o presidente da Federación Galega da Construción, Diego Vázquez, agradeceu este "bo agasallo antes de nadal", que introduce o PP emendando a lei de acompañamento aos orzamentos do ano que vén. "É importante para a sustentabilidade das empresas", subliñou.
Este venres, a dirixente galega e o representante dos construtores reuníronse para abordar a problemática que leva a crise de desabastecemento, unha "preocupación compartida" xa que, segundo a Xunta, esta situación "pode bloquear as obras públicas" e a execución de infraestruturas "relevantes".
Para facer fronte a isto e evitar "a parálise da obra pública", as que estean en execución desde o 1 de xaneiro deste ano e "sempre que a variación de materiais sexa superior a un 20 por cento respecto do recolleito nos contratos e supoñan unha perda para o contratista superior ao 6 por cento", a Xunta poderá realizar, previa solicitude do contratista, "unha compensación económica ou unha modificación dos materiais tidos en conta para a elaboración do proxecto de licitación, que permita un abaratamento dos custos e que non implique unha minoración na funcionalidade da obra".
Respecto diso, Ethel Vázquez lembrou que "a día de hoxe estanse executando moitísimas obras" para a vertebración do territorio, para avanzar na mobilidade sustentable, o saneamento das rías, a construción de infraestruturas hospitalarias e outras aliñadas co crecemento verde.
En calquera caso, estas compensacións, que se aplicarán "a partir do 1 de xaneiro de 2022" cunha metodoloxía coa que "desde xa" empeza a traballar a administración autonómica, "deben afrontarse a nivel estatal e europeo porque é unha crise de subministracións internacional", en opinión da conselleira. Pola súa banda, a Xunta quere "ser pioneira" e destaca que Galicia "será pioneira en implantar medidas e normativas para evitar a parálise e para reactivar a obra pública". No que se refire ás súas contas, asegurou que é "unha medida máis que conta con respaldo económico, administrativo e xurídico e técnico".
En canto á modificación dos materiais, precisou que se fará "sempre garantindo a funcionalidade pero buscando materiais de proximidade". Trátase de "facer viable a obra pública" a través de "diferentes alternativas, non só económicas".
E referiuse a obras concretas afectadas, como "se viu recentemente a paralización da intermodal de Pontevedra", de modo que o Executivo autonómico "aventuraba unha parálise absoluta de moitas infraestruturas".
O SECTOR
Pola súa banda, o presidente da Federación Galega da Construción falou de "un día de esperanza para o sector, que ten máis de 80.000 traballadores e 8.000 empresas en Galicia e que ten na obra pública un dos seus alicerces".
"Era algo fundamental, que viñamos reclamando hai meses, alertando ás administracións públicas de que había un problema sobrevindo que estaba a condicionar a execución dos contratos", sinalou.
Ante esta "preocupación moi grande", aplaudiu o "anuncio" da consellería, á que erixiu en "punta de lanza en España" posto que "vai ser a primeira medida de reequilibrio que se adopte en toda España", algo que equiparou co que ocorreu durante os inicios da pandemia coa reactivación das licitacións.
"Estamos moi satisfeitos coa medida, cos números e protocolos que levan aparellados. Parécenos xusto", subliñou Diego Vázquez, para quen "este documento pode ser adoptado por outras administracións públicas a máis diso que a administración central faga un documento ou medida xeral", que visualizou nun real decreto de revisión de prezos "ou outra medida".
