Por Europa Press / Redacción | SANTIAGO DE COMPOSTELA | 22/11/2021 | Actualizada ás 10:47
A central térmica de Endesa na localidade coruñesa das Pontes renovará este luns a súa actividade ante o contexto de auxe de prezos da electricidade e a previsión da chegada de ondas de frío que provocarán un aumento do consumo enerxético. A planta, en proceso de peche desde finais do ano 2019, estará operativa, como mínimo, ata o vindeiro venres, xa que o funcionamento da central planifícase semanalmente.
O reinicio da actividade foi confirmado por fontes próximas á compañía enerxética, que inciden no carácter excepcional da medida, para o que a planta se foi preparando ao longo das últimas semanas. O pasado martes iniciouse o traslado ás Pontes das 100.000 toneladas de carbón que se encontraban almacenadas no porto exterior de Ferrol e que, agora, abastecerán o funcionamento da térmica.
O carbón foi adquirido por Endesa co obxectivo de retomar a actividade na súa planta ante a chegada do inverno nun contexto de auxe dos prezos a nivel global. Así, o primeiro cargueiro con carbón chegou a Ferrol con 20.000 toneladas a finais de outubro, mentres que o segundo fíxoo o pasado 14 de novembro con 80.000 toneladas do mineral.
Por tanto, Endesa dispón agora de 140.000 toneladas de carbón para a súa combustión, debido a que, ás traídas por vía marítima nas últimas semanas, súmanse as 40.000 que están almacenadas desde hai meses no propio recinto da central.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.