Illado no seu domicilio o concelleiro socialista de Pontevedra Iván Pontes tras dar positivo en Covid
Atópase "con síntomas de carácter leve", semellantes aos de "un proceso gripal".
Por E.P. | PONTEVEDRA | 22/11/2021 | Actualizada ás 12:47
O concelleiro de Desenvolvemento Sustentable e Medio Natural de Pontevedra, o socialista Iván Pontes, permanece illado no seu domicilio despois de dar positivo por Covid-19 nunha PCR.
Así o informou este luns o grupo socialista ao que pertence este concelleiro no goberno de coalición co BNG. Segundo concretaron, atópase illado no seu fogar "con síntomas de carácter leve", semellantes aos de "un proceso gripal".
Ademais, aínda que non presentan síntomas e obtiveron resultados negativos mediante test de antíxenos e "o protocolo non lles obriga a quedar en casa", ao estar vacinados e sen síntomas, os seus compañeiros Yoya Branco e Marcos Rey decidiron quedar igualmente nos seus domicilios "por prudencia", concretaron as mesmas fontes municipais.
En todo caso, as mesmas fontes municipais, indicaron que se prevé que "en breve sexan contactados polos rastreadores".
