A Xunta completará o deseño da Axenda Urbana para Galicia coa aprobación da Lei de arquitectura

A conselleira de Medio Ambiente, Territorio e Vivenda, Ángeles Vázquez, anunciou que se completará o deseño da Axenda Urbana para Galicia mediante a aprobación da Lei de arquitectura, que se atopa en fase de información pública.

Así o avanzou desde Copenhague (Dinamarca), onde se desprazou en representación da Xunta xunto a outras institucións convidadas pola embaixada danesa para intercambiar experiencias sobre eficiencia enerxética, modelos de construción sustentables e a aplicación da Axenda Urbana.

Neste contexto, indicou que a Xunta incorporou os obxectivos da Axenda Urbana Española e a propia Axenda para o Desenvolvemento Sustentable 2030 na Lei de ordenación do territorio, que entrou en vigor este ano.

Neste sentido, explicou que os principais obxectivos de Galicia neste ámbito inclúen ordenar o territorio, facer un uso racional do chan, evitar a dispersión urbana, previr e reducir o impacto do cambio climático, impulsar a economía circular e favorecer a mobilidade sustentable. Ademais, búscase fomentar a cohesión social, impulsar a economía urbana, garantir o acceso á vivenda, liderar a innovación dixital e mellorar a gobernación.

A conselleira tamén avanzou que a futura Lei de arquitectura de Galicia representará unha nova ferramenta lexislativa que permitirá alcanzar os obxectivos aliñados cos retos da Axenda Urbana. Así, incidiu en que esta disciplina redunda na calidade de vida das persoas e a cohesión social.