Os opositores da Coruña terán unha sala de estudo específica para eles na biblioteca do Círculo de Artesáns

O Concello da Coruña levará a cabo unha reforma na biblioteca do Círculo de Artesáns para a creación dunha sala de estudo para opositores, que levaban tempo realizando esta demanda.

Así o anunciou a alcaldesa da cidade, Inés Rey, durante a súa visita á institución, na que estivo acompañada pola concelleira de Benestar Social, Yoya Neira, e o presidente do Círculo de Artesáns, Roberto Parga.

Doutra banda, o Concello tamén acometerá a catalogación da biblioteca da institución, que segundo explicou a alcaldesa, ten "volumes históricos" e é necesario "coidar, catalogar e pór a disposición da cidadanía".

Proximamente, o Círculo de Artesáns celebrará o seu 175 aniversario. A rexedora coruñesa expresou que esta sociedade forma parte da "memoria colectiva" e que por tanto hai que "potenciala, coidala e dala a coñecer".