Por E.P. | Santiago de Compostela | 24/11/2021 | Actualizada ás 18:57
A conselleria de Emprego e Igualdade, María Jesús Lorenzana, asegurou este mércores que o Goberno galego traballa para "reforzar" os xulgados de violencia de xénero, pero lembrou que non pode "crear" tribunais novos, posto que as competencias nesa materia son estatais.
Durante o pleno do Parlamento de Galicia, en resposta a unha cuestión do grupo socialista sobre o "colapso" dos xulgados especializados en violencia de xénero, así como dos de instrución ou 1ª instancia encargados destes temas, Lorenzana recalcou que as competencias en xustiza "son do Goberno estatal do PSOE" e que a organización, tal e como está establecida, recóllese nunha lei estatal.
Ademais, recalcou que a ampliación dos xulgados de violencia de xénero está no acordo de investidura asinado polo BNG. "Demandan á Xunta que faga algo que non pode facer, onde non ten competencia. Non podemos crear xulgados novos", aseverou Lorenzana.
Máis aló da creación de novos tribunais, o grupo socialista instou á Xunta a dotar de máis persoal aos xulgados xa existentes e a formar os traballadores en materia de igualdade, "moi necesario no ámbito xudicial". O PSdeG achegou ademais algún dato, como os 265 procedementos aínda pendentes no xulgado da Coruña ou que o 80% das mulleres asasinadas non chegaron a denunciar, o que demostra "que non confían na xustiza".
A este respecto, Lorenzana detallou algunhas das medidas postas en marcha pola Xunta para reforzar o sistema, como é a atención nos centros da muller, a asistencia en liña, os convenios coas sociedades de psicoloxía e de traballo social de Galicia, a personación da propia Xunta de Galicia nalgúns dos procedementos desde 2013 ou a asistencia xurídica gratuíta.
Tamén destacou o oito reforzos no sete xulgados de violencia de xénero, a prolongación das xornadas ou o Plan Global de Reforzo, "agora mesmo en mans do Tribunal Superior de Xustiza de Galicia", que debe trasladar ao Ministerio de Xustiza.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.