Por Europa Press / Redacción | Ourense | 24/11/2021 | Actualizada ás 19:13
O alcalde de Ourense, Gonzalo Pérez Jácome, convocou aos portavoces dos grupos políticos na corporación local a celebrar unha reunión o próximo 29 de novembro para tentar desbloquear a cesión dunha parcela para a construción da residencia proxectada pola Fundación Amancio Ortega.
A cita, ás 08,30 horas no salón de plenos, foi promovida coa intención de retomar a proposta de cambio de uso da parcela, que non saíu adiante ao non conseguir a maioría absoluta do pleno.
En concreto, o xeriátrico que construirá a Xunta de Galicia coa achega da Fundación Amancio Ortega por 12 millóns de euros recibiu o 'non' tres veces en tres planos distintos; dous durante o mes de setembro e o último no mes de outubro.
O rexedor municipal pretende levar o tema por cuarta vez para abordar o cambio de uso da parcela da antiga estación de autobuses coa finalidade de que pase a ter usos de sistema xeral de equipamento asistencial, sistema local de equipamento deportivo e sistema local de parques, para que se poida levar a cabo a construción.
No entanto, no último pleno as posturas estaban definidas: apoiaron a proposta os tres concelleiros de Democracia Ourensana, os sete do Partido Popular e o único representante de Ciudadanos, así como dous do non adscritos, polo que a proposta quedou rexeitada por un único voto --a maioría son os 14---.
Con todo, Pérez Jácome tenta levalo por cuarta vez a votación a pesar de que na última sesión plenaria avanzara que "solicitaría á Xunta" a Lei de Medidas en Materia de Proxectos Públicos de Urxencia ou de Excepcional Interese para tratar de desbloquear a postura de PSOE e BNG.
O proxecto da futura residencia de maiores, anunciado polas conselleiras de Política Social e de Infraestruturas no 2020, contempla 120 prazas para atención a maiores supondo a creación de 110 postos de traballo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.