Investigado un home de Valencia por sextorsión tras unha denuncia posta en Arzúa
A vítima contactou cun falso anuncio de servizos sexuais e empezou a recibir ameazas para que pagase cantidades de diñeiro.
- Galicia envórcase co 25N e insta a romper o "silencio cómplice" que perpetúa a violencia machista
- O Parlamento Galego tipificará a violencia dixital como violencia machista esta semana
Por E.P. | SANTIAGO DE COMPOSTELA | 27/11/2021 | Actualizada ás 17:52
A Garda Civil investigou un home de Paterna (Valencia) como presunto autor dun delito de estafa, na modalidade de extorsión sexual, por mor dunha denuncia interposta en Arzúa. As pescudas foron levadas a cabo polo Equipo @ do Instituto Armado en Milladoiro, en colaboración co Equipo de Delitos Tecnolóxicos (Edite) de Valencia no marco da operación 'Arpu'.
Na denuncia que o iniciou todo, a vítima relataba como contactara cunha persoa que supostamente ofrecía servizos sexuais a través de anuncios inseridos en medios de comunicación, pero que resultaron ser falsos. Así, a persoa prexudicada empezou a recibir mensaxes e chamadas ameazantes para que ingresase unha serie de cantidades de diñeiro para que non se fixesen públicos os feitos.
Accedeu a ingresar a primeira contía solicitada, pensando que así satisfaría a demanda dos extorsionadores. Con todo, en pouco tempo volveu recibir unha nova ameaza para que abonase máis diñeiro. En total, pagou 3.600 euros antes de interpor a denuncia.
A Garda Civil investigou os feitos en aras de corroborar a súa veracidade e de identificar o autor, que resultou ser un veciño do municipio valenciano de Paterna. Unha vez coñecida a autoría, o Equipo @ solicitou a colaboración do Edite de Valencia para proceder á súa investigación como presunto autor dun delito de estafa na modalidade de 'sextorsión'.
O investigado, xunto coas actuacións realizadas, foi posto a disposición do Xulgado de Instrución de Arzúa.
