A USC abre a rúa Jimena e Elisa Fernández de la Vega como primeiro paso no proxecto da Cidade da Saúde

A Universidade de Santiago de Compostela sacou adiante este martes a primeira actuación no marco do proxecto de Cidade da Saúde que busca implantar no Campus Sur, coa posta en funcionamento e apertura da rúa Jimena e Elisa Fernández de la Vega.

Alí desprazouse o reitor da institución, Antonio López, xunto co xerente, Javier Ferreira, e algúns dos decanos das facultades desta rama de coñecemento, entre eles o de Farmacia, Francisco Otero Espinar, e os seus homólogos en Medicina e Enfermaría, entre outros.

Estas vías rodean os 12.000 metros cadrados edificables onde está previsto o futuro complexo que acollerá diversos espazos destinados a docencia e investigación.

Antonio López destacou que as parcelas están preparadas e xa se abriu a licitación do concurso de ideas, cuxo prazo terminará no mes de febreiro, para este proxecto arquitectónico que se situará a ambos os dous lados desta rúa.

A prioridade da institución é afrontar de forma inmediata a nova Facultade de Farmacia co fin de "buscar unha solución docente o máis rápido posible" e poder concentrar o alumnado neste novo inmoble. A maiores, proxéctase a construción do bloque administrativo e de xestión e outra parte dedicada a investigación.

O reitor compostelán sinalou que o obxectivo é, ademais, traer a este emprazamento a Facultade de Enfermaría e que se baralla a posibilidade de situar instalacións do IDIS e da Fundación Pública de Medicina Xenómica.

"É unha necesidade evidente da nosa universidade", destacou López, para insistir en que o impulso á nova Facultade de Farmacia sitúase como "proxecto prioritario número un" de cara ao Plan de Infraestruturas que as universidades negocian coa Xunta de Galicia.

O decano desta disciplina, Francisco Otero Espinar, destacou especialmente a urxencia de contar con estas instalacións e por darlle prioridade ao aulario, dado que actualmente estanse dando prácticas en "condicións que non deberían ser". "Este primeiro paso é algo bastante importante", insistiu.

Segundo detallou, o novo inmoble debe contar co carácter "multidisciplinar" destes ensinos, dado que os investigadores traballan en campos tanto biolóxicos como químicos ou relacionados co ámbito da medicina.

"O máis complexo é poder ter unhas instalacións que se adapten a todos estes tipos de traballo", sinalou, dado que requiren certos sistemas e infraestruturas específicas que teñen que ver con elaboración de medicamentos, seguridade ou manipulación e tratamento de residuos, entre outros.

Neste sentido, a pandemia "retardou un pouco" os plans da institución, dado que o concurso de ideas estaba previsto inicialmente para principios deste ano e a situación sanitaria obrigou a centrarse noutros asuntos prioritarios.

"Un parón inevitable", engadiu o reitor compostelán, que incidiu en que o proxecto debe ter en conta cuestións como ventilación de espazos, entradas e saídas, á hora de deseñar o espazo docente, do mesmo xeito que ferramentas relacionadas coas novas tecnoloxías e a dixitalización.