A Seguridade Social gana 2.847 afiliados medios en novembro en Galicia, case como a media
Son 25.614 traballadores máis dados de alta ao sistema respecto de hai un ano, o que supón un incremento do 2,54%.
Por E.P. | Santiago de Compostela | 02/12/2021 | Actualizada ás 12:03
A Seguridade Social gañou en novembro en Galicia unha media de 2.847 afiliados respecto ao mes de outubro (+0,28%), o que situou o número total de ocupados en 1.035.498 cotizantes, segundo os datos que publica este xoves o Ministerio de Inclusión, Seguridade Social e Migracións.
Respecto de novembro de 2020, son 25.614 traballadores máis dados de alta ao sistema na comunidade galega, o que supón un incremento do 2,54%.
A repartición das afiliacións en Galicia é a seguinte: 806.006 no réxime xeral (775.182 no subtipo xeral, 5.731 no sector agrario e 25.094 no do fogar), 209.069 autónomos e 20.422 do mar. No conxunto estatal, a Seguridade Social gañou en novembro unha media de 61.768 cotizantes respecto ao mes de outubro (+0,3%), o que situou o número total de ocupados en 19.752.358 cotizantes.
DATOS ESTATAIS
En termos desestacionalizados, o número de cotizantes á Seguridade Social incrementouse en novembro en 109.451 traballadores (+0,5%), o seu maior repunte neste mes de toda a serie, o que situou o total de ocupados en 19.771.613 persoas.
Con esta cifra non só se supera o nivel previo de afiliados ao comezo da pandemia (291.799 cotizantes máis que en febreiro de 2020), senón que se alcanza o volume máis alto de afiliados da serie histórica desestacionalizada, segundo destacou o Ministerio.
No último ano a Seguridade Social gañou 730.356 afiliados en valores medios (+3,8%), a maior parte no Réxime Xeral (+672.945 cotizantes), seguido do Réxime Especial de Traballadores Autónomos (RETA), con 57.535 novos ocupados.
A ganancia mensual de afiliados medios en novembro debeuse a ambos os sexos, aínda que algo máis ás mulleres, que sumaron no mes 32.267 cotizantes respecto de outubro (+0,3%), fronte a un repunte de homes afiliados de 29.502 cotizantes (+0,3%).
Deste xeito, a cifra de mulleres cotizantes mantívose por encima da barreira dos 9 millóns de ocupadas por sexto mes consecutivo, cun total de 9.237.641 afiliadas, novo máximo histórico, fronte a 10.514.717 homes ocupados.
A afiliación media de estranxeiros, pola súa banda, incrementouse en 2.137 cotizantes en novembro, un 0,09% respecto de outubro, ata situarse en 2.263.281 ocupados.
A EDUCACIÓN SUMA 30.000 AFILIADOS
Por réximes, o xeneral, o máis numeroso do sistema, gañou 60.944 afiliados medios en novembro (+0,4%), ata un total de 16.363.613 ocupados.Dentro deste réxime, a educación liderou o aumento da ocupación, con 29.735 novos cotizantes respecto de outubro (+2,9%), seguido do comercio (+28.789 novos afiliados, +1,2%), e das actividades administrativas (+16.835 cotizantes, +1,2%).
No lado oposto, destaca a caída da afiliación na hostalaría, con 62.633 afiliados menos (-4,9%), así como o retroceso de cotizantes nas actividades sanitarias (-8.973 ocupados, -0,5%).
O Réxime de Autónomos tamén gañou ocupados en novembro, cun aumento medio de 1.080 afiliados (+0,03%), o que situou o total de cotizantes por conta propia en 3.325.408.
AFILIACIÓN DESESTACIONALIZADA
Descontando a estacionalidade e o efecto calendario, en novembro rexistráronse aumentos da afiliación nos servizos (+91.989), a industria (+9.460) e a construción (+6.753), fronte a descenso de 8.091 cotizantes na agricultura polo fin da maioría das campañas agrícolas.
O Ministerio de José Luís Escrivá destacou que a rama de industria creceu en afiliación de forma consecutiva en todos os meses desde xuño de 2020, mentres que a construción faino desde febreiro e servizos, desde maio.
Por sectores, destacan os crecementos de afiliación en termos relativos en servizos de aloxamento (+4,9%), actividades relacionadas co emprego (+4,9%), actividades artísticas e espectáculos (+3,6%) e actividades deportivas (+3,3%).
No entanto, en valores absolutos, servizos de comidas e bebidas liderou en novembro o crecemento da afiliación desestacionalizada, con 30.129 ocupados máis.
Pola súa banda, o número de asalariados aumentou en 103.078 traballadores en novembro, mentres que o de non asalariados fíxoo en 4.499 persoas. Este colectivo acumula 13 meses consecutivos de aumentos da afiliación.
BAIXAN OS TRABALLADORES EN ERTE
Pola súa banda, o número de traballadores en expedientes de regulación temporal de emprego (ERTE) situouse a 1 de decembro en 125.632 persoas, fronte aos 165.624 de finais de outubro, de acordo cos datos provisionais manexados por Seguridade Social.
O ministerio insiste na provisionalidade das cifras xa que, coa entrada en vigor do Real Decreto-Lei 18/2021, requiriuse un traballo de adaptación no sistema REDE para que as empresas comuniquen as prórrogas e/ou novos ERTE mediante a anotación dos tipos de inactividade.
Aínda que o proceso de adaptación implementouse o pasado 26 de novembro, as empresas dispoñen de todo o mes de decembro para a anotación de ERTE con efectos desde 1 de novembro, polo que a día 2 de decembro aínda non se rexistraron moitas das variacións e novas anotacións de ERTE.
"Isto fai que os datos de que dispomos sexan provisionais e estean suxeitos a variacións significativas nos próximos días", apunta o Ministerio.
