A plataforma Vía Galega cualifica de "legado do franquismo" a Constitución do 78 que "nega a Galicia como pobo"

Considera que "o mal chamado Estado das Autonomías non foi máis aló dunha mínima descentralización administrativa", xa que "as prerrogativas importantes" seguen en mans do Goberno estatal.

Por E.P. | Santiago de Compostela | 05/12/2021 | Actualizada ás 19:39

Comparte esta noticia

A plataforma nacionalista Vía Galega advirte que a Constitución española de 1978 é "legado do franquismo" porque "non supuxo unha ruptura democrática" coa ditadura, senón "un acordo" coa mesma. Ademais, engade, "non hai motivos que celebrar" este luns porque é un texto que "nega a Galicia como pobo".

A través dun comunicado emitido este domingo, véspera da celebración do 6 de decembro, Día da Constitución, este colectivo asegura que supuxo "prevalecer" as estruturas do franquismo no aparello militar e policial, no poder xudicial e nun "discriminatorio modelo económico".

Segundo Vía Galega, a Carta Magna tivo o "obxectivo claro" de "paralizar os avances das reivindicacións nacionalistas" e "asentar un marco político-xurídico españolizador e centralista", así como "impedir o camiño cara á soberanía nacional".

É máis, a plataforma considera que "o mal chamado Estado das Autonomías non foi máis aló dunha mínima descentralización administrativa", xa que "as prerrogativas importantes" seguen en mans do Goberno estatal.

Neste contexto, Vía Galega insiste en que a Constitución se converteu "nun obstáculo das reivindicacións nacionais" e "nega dereitos colectivos fundamentais como é o dereito dos pobos a decidir o seu futuro mediante o exercicio da autodeterminación".

"É unha Constitución que nega a Galicia como pobo e condena á nosa lingua a ser estranxeira no noso propio país", asevera, posto que os galegos "teñen a obrigación de coñecer o español", ao que se refiren como "lingua imposta e allea", pero "non o galego".

Así mesmo, Vía Galega cuestiona a designación de Juan Carlos de Borbón como "sucesor de Francisco Franco" na Xefatura do Estado. O monarca converteuse así en "cabeza visible dunha monarquía corrupta" xunto a altos cargos e ministros da ditadura que foron "responsables da represión e de crimes de lesa humanidade" que non foron xulgados.

Por todo iso, a plataforma Vía Galega afirma que "non hai motivos para celebrar" este luns o aniversario dunha Constitución baseada "no legado do franquismo" e "que nega o dereito" a que Galicia se autogobierne "libremente".

Constitución española
Constitución española | Fonte: Vía Galega

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Moine

O problema é que a gente quer que em Galiza governe Frijol; e vota PP, eleiçom trás eleiçom. Isto da para pensar que caral… tenhem um grande segmento dos galeg@s nos seus miolos. “Dam-lhe o pau de maçar o polvo” ao seu carrasco, e ele lhes entrega por volta: A Emigraçom dos seus filhos e filhas.