A Deputación de Pontevedra destina 1,7 millóns para dúas actuacións na capital provincial
O groso da partida, 1'4 millóns de euros, irá destinado á rehabilitación do interior da Casa Consistorial para o seu uso institucional.
Por Europa Press / Redacción | SANTIAGO DE COMPOSTELA | 10/12/2021 | Actualizada ás 17:40
A Deputación de Pontevedra aprobou este venres dous convenios enmarcados no protocolo de colaboración co Concello de Pontevedra que suporán a mobilización de máis de 1,7 millóns de euros para acondicionar unha pacela sobre a vía férrea na rúa 12 de Novembro e para a rehabilitación interior da antiga casa consistorial.
No primeiro dos convenios a Deputación financiará con medio millón de euros o proxecto para abrir ao público e dotar dun novo parque a parcela de 5.500 metros cadrados existente na pasarela de José Adrio Barreiro, entre as rúas da Estrada e As Hortas (nas proximidades de Santa Teresa de Jesús Jornet).
A deputación asume ao 100% o financiamento desta actuación, que corresponde sacar a concurso ao goberno local que encabeza o rexedor Miguel Anxo Fernández Lores, previo paso de recibir o visto e prace da Adif, autorización que xa foi solicitada.
Esta actuación permitirá darlle continuidade á área recreativa existente na rúa José Adrio Barreiro, que dotará á á zona este da cidade dun espazo verde conectado co do parque Amalia Álvarez.
REHABILITACIÓN CASA CONSISTORIAL
Ademais, a deputación tamén deu luz verde ao convenio para a rehabilitación interior e mellora da accesibilidade da antiga Casa consistorial, unha actuación valorada en preto de 1,4 millóns de euros dos que a institución provicincial achega o 90% (1.225.000 euros) e o concello asume o 10% restante.
As obras do interior centraranse a primeira planta do edificio, datado de 1879 para destinalo a usos institucionais. Os traballos tamén solucionarán o problema de accesibilidade coa instalación dun ascensor e unha entrada adaptada desde a parte traseira.
Neste caso, o concello xa aprobou o inicio do proceso de contratación para a renovación e reforma da Casa Consistorial da Praza de España. Trátase dun dos proxectos que máis "ilusión" xera dentro do Goberno municipal a causa do que supón a recuperación dun equipamento destas características e do simbolismo que ten para coa cidade.
