Sanidade habilitará o autotest de saliva en farmacias para nenos de 5 a 11 anos

As farmacias galegas terán dispoñibles a partir do venres 17 de decembro os autotest de saliva para a detección da covid-19 en nenos de 5 a 11 anos, segundo avanzou este domingo o conselleiro de Sanidade, Julio García Comesaña, nunha entrevista concedida á Radio Galega.

Cada un destes menores terá asignada unha destas probas que os pais terán que achegarse a recoller ata a farmacia para facelas no seu domicilio. No caso de que o resultado fose positivo, terían que contactar co Servizo Galego de Saúde (Sergas) para confirmalo a través dunha PCR.

Deste xeito, o máximo responsable sanitario da Xunta garantiu que se "reforzarán" os ocos de citas para a realización de test a estes nenos "no rango de 24-48 horas". En Galicia hai uns 150.000 cidadáns de entre 5 e 11 anos e a previsión de Sanidade é que todos poidan facerse esta proba, aínda que "en principio non hai límite" de dispoñibilidade contemplado.

O arranque desta medida a partir do 17 de decembro, sumada ao comezo da vacinación dos menores de 12 anos prevista para o mércores 15, prodúcese nun contexto de escalada progresiva da incidencia da pandemia do coronavirus en España e en Galicia.

"Os datos non son positivos", recoñeceu o conselleiro, posto que as cifras de incidencia acumulada --proporcionados polo Ministerio de Sanidade o venres-- sitúan Galicia con 383 casos por 100.000 habitantes a 14 días, por enriba dos 323 casos por 100.000 habitantes da media estatal.

Con todo, Comesaña celebrou que a ocupación dos hospitais galegos mantense "nun valor aceptable" e por baixo do dato global de España, cun 3,12% de pacientes covid en camas convencionais --un total de 225 ingresados, segundo os últimos datos da Xunta-- e un 5,37% na UCI --48 enfermos--.