A patronal de transportistas mantén o paro para antes do Nadal
Mantense a folga para os días 20, 21 e 22 de decembro, tras o fracaso da reunión con representantes do Ministerio.
Por Europa Press / Redacción | Madrid | 13/12/2021 | Actualizada ás 20:21
O Comité Nacional de Transporte por Estrada (CNTC) reiterou este luns a súa postura de manter o paro convocado para os días 20, 21 e 22 de decembro, tras unha reunión con representantes do Ministerio de Transportes, Mobilidade Axenda Urbana na que non se produciron avances significativos.
A patronal critica que a secretaria de Estado de Transportes, Mobilidade e Axenda Urbana, Isabel Pardo de Vera, non se presentou á reunión, convocada por ela mesma na sede do Ministerio.
No entanto, o encontro produciuse con representantes do Ministerio e da patronal. O Comité de transportistas mantivo "de maneira uniforme a súa liña reivindicativa sen que se producise ningún avance respecto dos asuntos expostos nas negociacións".
Neste contexto, o CNTC manifestou a súa vontade de negociar "ata o último momento", polo que decidiu manter o paro convocado para antes de Nadal á espera "de recibir unha proposta do Goberno que atenda as súas reclamacións".
