Por Europa Press / Redacción | Lugo | 15/12/2021 | Actualizada ás 20:36
O alcalde de Castroverde, Xosé María Arias, volverá aspirar por terceira vez a facerse coa Secretaría Xeral do PSOE provincial de Lugo, un proceso interno no que se agarda que tamén se presente o presidente da Deputación e alcalde de Monforte, José Tomé.
O rexedor de Castroverde trasladou a súa intención a varios alcaldes e portavoces do PSOE na provincia na tarde deste mércores, xornada na que, precisamente, o PSOE provincial celebrou unha executiva para convocar o comité provincial que marcará o calendario deste proceso interno.
Xosé María Arias explicou que volverá dar o paso, que fará oficial cando arrinque o proceso interno e nos prazos oportunos, co convencemento de que o partido debe "ter vida orgánica" separada das institucións.
Ademais da candidatura do rexedor de Castroverde, fontes socialistas dan por feito que concorrerá ao proceso o alcalde de Monforte e presidente da Deputación de Lugo, José Tomé. Con todo, preguntado respecto diso, rexeitou pronunciase sobre este asunto ata o momento no que se abran os prazos.
Pola súa banda, a actual secretaria xeral do PSOE provincial de Lugo, Patricia Otero, confirmou que non competirá neste proceso interno e lembra que ela accedeu a liderar a formación co obxectivo de "darlle unha estabilidade" tras "momentos complicados" pero sen afán de "manterse no tempo no cargo". Ademais, puxo en valor o traballo feito durante a súa etapa como secretaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.