Por E.P. | SANTIAGO DE COMPOSTELA | 27/12/2021 | Actualizada ás 16:40
A Xunta abrirá este martes o prazo para que mulleres que resulten gravemente feridas pola violencia machista, así como os fillos e fillas menores de 30 anos das mulleres vítimas mortais, poidan solicitar axudas que ascenderán a 7.000 euros. O Diario Oficial de Galicia (DOG) publicou este luns a convocatoria destas indemnizacións para 2022, que contarán cun orzamento total de 70.000 euros. O límite temporal para solicitalas será o 30 de novembro do próximo ano.
Segundo informa a Xunta, a persoa beneficiaria da axuda recibirá 7.000 euros de indemnización nun único pago, que se completa cunha asistencia integral no marco das medidas que Galicia ofrece en apoio ás mulleres e aos menores na súa recuperación. No caso dos orfos, poderán recibir a contía sempre que na data do falecemento da súa nai fosen menores de idade e convivisen con ela --independentemente da renda familiar-- ou, en caso dos maiores de ata 30 anos, que dependan economicamente da nai ou do pai agresor.
No caso das mulleres, a Xunta apoia aquelas que resultan feridas gravemente, con lesións que requiran de hospitalización a consecuencia dunha agresión de violencia de xénero. En ambos os casos, para poder acceder á convocatoria de 2022, os feitos teñen que producirse con posterioridade ao 1 de xullo de 2020.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.