Por E.P. | SANTIAGO DE COMPOSTELA | 27/12/2021 | Actualizada ás 18:05
O BNG denunciou as modificiones horarias adoptadas nos trens Avant que conectan Ourense con Santiago e A Coruña tras a entrada en funcionamento da liña de AVE entre a Cidade das Burgas e o centro da península.
Nun comunicado, o deputado do BNG non Congreso, Néstor Rego, informa da presentación dunha batería de iniciativas que instan o Goberno a rectificar os cambios de horario que, di, prexudican as persoas que se desprazaban diariamente entre estas cidades por motivos laborais ou de estudo.
"Organizan os novos horarios baixo unha visión puramente centralista na que priorizan os servizos que conectan Galicia coa meseta pero non teñen en conta as necesidades de mobilidade interior", incidiu o parlamentario do Bloque. En concreto, Rego reclama que se restablezan os horarios da liña Avant que saía da Coruña ás 06,30 horas e chegaba ás 07,38 horas a Ourense; ademais de solicitar que "se recuperen todas as frecuencias suprimidas" durante a pandemia.
Así mesmo, a formación frontista tamén demanda unha redución no prezo dos billetes da liña entre A Coruña e Ourense, "unha das máis caras do Estado". Lembran que o prezo do traxecto entre Santiago e Ourense é de 17,70 euros que, en ocasións, se dispara ata os 20,30 euros.
"CACIQUISMO" EN OURENSE
Doutra banda, o BNG avanzou que levará ao Parlamento "o grave caso de caciquismo e arbitrariedade" que, ao seu xuízo, se produciu nos municipios ourensáns da Merca, Cartelle e Ramirás polos "incumprimentos" das bases de convocatoria dun taller de emprego. Segundo denuncia a formación frontista, os gobernos municipais "beneficiaron" a algúns aspirantes durante o proceso de selección convocado para o taller, organizado en Río Arnoia Ecoterras.
O BNG recolle as queixas destes supostos prexudicados, que denuncian o feito de ser sometidos a entrevistas con base en criterios "subxectivos", polo que se senten vítimas de "prácticas caciquís". Por tanto, o deputado no Parlamento autonómico Iago Tabarés comprometeuse a levar ao Pazo do Hórreo esta situación para demandar explicacións á Xunta, administración que, segundo o Bloque, achega á organización destes cursos un total de 370.000 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.