Por Europa Press / Redacción | SANTIAGO DE COMPOSTELA | 06/01/2022 | Actualizada ás 17:15
O presidente do PP en Pontevedra, Alfonso Rueda, censurou que a presidenta da Deputación, Carmela Silva, "continue sen dar explicacións" un mes despois de que o Tribunal Supremo ratificase a condena a un funcionario de Vigo por 'enchufar' nunha concesionaria municipal a unha cuñada da tamén edil.
Nun comunicado, Rueda considera este como "un caso moi grave de corrupción" no goberno local de Vigo e afirma que a cidadanía "merece explicacións". O presidente do PP en Pontevedra sentencia que Silva tivo no pleno extraordinario "unha magnífica oportunidade" para explicar "por que unha persoa vai ir ao cárcere condenado por enchufar á súa cuñada", denunciado que Silva "preferiu seguir calada, escondéndose detrás de López Font".
Ademais, engadiu que o deputado de Réxime Interior, Carlos López Font, "tampouco deu unha soa explicación sobre que opinión lle merece ao goberno local toda esta trama".
Rueda lamenta que Silva "vaia acumulando días sen aclarar esta situación" á cidadanía, e pregúntase se é "casualidade" que "a única beneficiada economicamente de toda a trama sexa precisamente un familiar de Carmela Silva e non unha persoa calquera". Tamén se cuestiona se á presidenta provincial, á "que tanto lle gusta pedir explicacións a todo o mundo, segue calada porque ten moito que ocultar".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.