Galicia supera os 61.600 casos activos pero mantense con 51 persoas en UCI
A taxa de positividade dispárase ao 29%, moi lonxe do 5% recomenado pola OMS, o que indica que podería haber moitos máis casos dos rexistrados polo Sergas. Hai 343 persoas hospitalizadas.
- As vacinas contra a covid-19, fundamentais para os transplantados de fígado
- Falecen cinco persoas que foran diagnosticadas con Covid
Por Europa Press / Redacción | SANTIAGO DE COMPOSTELA | 07/01/2022 | Actualizada ás 11:18
Os casos activos de Covid-19 seguen en aumento e pasan a barreira dos 61.000 por primeira vez en toda a pandemia en Galicia, ao situarse en 61.635 despois de rexistrarse 4.016 novos contaxios fronte a 2.157 altas no conxunto da Comunidade galega, na que aumentan os hospitalizados por este coronavirus ata os 394 --que supoñen 16 máis que o día anterior--. Pola súa banda, a taxa de positividade repunta a un 29 por cento.
Segundo os datos actualizados na mañá deste venres pola Consellería de Sanidade, con rexistros ata as 18,00 do xoves, descenden a 51 as persoas ingresadas en UCI pola Covid-19 en toda Galicia --dúas menos--, pero aumentan a 343 as hospitalizadas noutras unidades --18 máis--, mentres que 61.241 pacientes permanecen en seguimento no seu domicilio.
Por áreas sanitarias, a presión hospitalaria aumenta en catro das sete: A Coruña e Cee, Ourense, Lugo e Santiago e Barbanza; mantense nas de Vigo e na de Ferrol; mentres que se alivia na de Pontevedra e O Salnés. Na da Coruña e Cee aumentan a 12 os pacientes Covid en UCI --un máis-- e 74 os ingresados noutras unidades --seis máis--; mentres que na de Ourense, aínda que descenden a seis o críticos --un menos--, soben a 61 os doutras unidades --tres máis--.
Pola súa banda, na área de Santiago e Barbanza descenden a seis os pacientes en UCI --un menos-- e aumentan a 58 os doutras unidades --nove máis--; e na de Lugo caen a cinco o críticos --un menos-- pero soben a 25 os doutras unidades --dous máis--. Na área de Ferrol mantense un paciente Covid en UCI e 17 noutras unidades --sen cambios en ambos os casos--; mentres que na de Vigo descenden a 13 os críticos --un menos--, pero soben a 68 os ingresados noutras unidades --un máis--. E a presión hospitalaria alíviase na de Pontevedra e O Salnés, na que, aínda que soben a oito os críticos --un máis--, baixan a 40 os doutras unidades --tres menos--.
MÁIS DE 61.000 CASOS
Os casos activos de Covid-19 seguen en ascenso en Galicia ata os 61.635, cifra récord desde o inicio da pandemia, 1.944 máis que os rexistrados ata o día pasado, ao haber de novo máis contagios (4.016), que altas (2.157), ao que se engaden cinco falecementos. O pasado venres --31 de decembro-- había 41.800 infeccións en toda a Comunidade galega.
O maior aumento de casos activos corresponde á área da Coruña e Cee (+562), seguida da de Ourense (+290), Vigo (+283), Santiago e Barbanza (265), Lugo (211), Ferrol (193) e Pontevedra e O Salnés (140). Así, con máis casos activos mantense a área sanitaria de Vigo, con 13.559; seguida da da Coruña e Cee, con 11.597; Santiago e Barbanza, con 11.355; Pontevedra e O Salnés, con 7.494; Ourense, con 7.454; Lugo, con 6.182; e á cola segue a de Ferrol, con 3.994.
Segundo os últimos datos actualizados polo Ministerio de Sanidade este pasado mércores 5 de xaneiro, a incidencia acumulada a 14 días de Galicia sobe a 2.308,24 casos por 100.000 habitantes, fronte aos 2.574,46 de media en España.
OUTROS 4.000 CONTAXIOS
Polo seu lado, os novos contaxios de Covid-19 descenden lixeiramente a 4.016, que supoñen 853 menos que os 4.869 do día anterior; tras os 4.965 do mércores, 3.815 o martes e comezar esta semana con 2.899, que supuxeron o primeiro descenso por baixo dos 3.000 desde o luns 27 de decembro. O xoves, venres e sábado da semana anterior superaron os 5.000.
Galicia acumula desde o inicio desta pandemia 274.474 contaxiados por coronavirus, dos que 60.676 corresponden á área de Vigo; 59.047, á da Coruña; 41.406, á de Santiago; 35.087, á de Ourense; 32.998, á de Pontevedra; 28.404, á de Lugo; e 16.856, á de Ferrol. Nas últimas 24 horas levaron a cabo en Galicia 12.208 PCR, o que eleva a 3.393.915 as realizadas ata o momento; e 5.573 test de antígenos, que suman 1.200.346 desde o inicio da pandemia, o que supoñen 17.781 probas feitas entre ambas.
En canto á taxa de positividade en PCR --número de infeccións detectadas cada 100 tests--, repuntou a un 29,06 por cento, tras situarse no 24,15% este xoves, no 23,3% o mércores, descender ao 21,88% o martes e iniciar esta semana cun 28,54%. Por tanto, mantense moi por encima do limiar do 5% que fixa a Organización Mundial da Saúde (OMS) para dar por controlada a pandemia.
