Alto seguimento no primeiro paro na planta de Leche Celta de Pontedeume para reclamar melloras no convenio

Os traballadores da empresa de Leite Celta no seu centro de traballo de Andrade, en Pontedeume, secundaron de maneira maioritaria o paro convocado desde o comité de empresa tras a ruptura das negociacións do convenio colectivo desta planta de transformación de produtos lácteos.

A parte social, representada de maneira maioritaria pola CIG, estima que a dirección da empresa pretende establecer "un sistema retributivo que suporía por unha banda penalizar salarialmente as persoas que enfermen ou que gocen de licenzas retribuídas".

Ademais, cren que o convenio que expón a compañía "condiciona o incremento económico a uns parámetros nos que as persoas afectadas non poden incidir", segundo detallou a presidenta do comité de empresa, María Xosé Vizoso (CIG).

A convocatoria de folga na planta que conta cun persoal duns 170 traballadores abarca nove días deste mes de xaneiro a partir deste luns. O calendario de protestas continuará este martes, con paralización da actividade entre as 12,00 e as 16,00 horas.

"Nós queremos avanzar cun novo convenio, levamos un ano de negociación e o que pretendemos son melloras sociais e económicas para todos, e que non teña que repercutir que unha persoa estea de baixa para poder cobra máis ou menos", detallou Vizoso.

Segundo detallou a presidenta do comité de empresa, a dirección transmite aos seus traballadores que "vai fatal e ten moitos problemas para cumprir os obxectivos e que están en perdas".

"Pretenden condicionar precisamente o noso soldo a eses números que eles mesmos estiman que non se van cumprir, por iso nosa negativa", continuou a representante sindical, que apuntou esta cuestión como motivo da ruptura das negociacións.

"Non quixeron valorar nin tan sequera as nosas propostas", apostilou. Tras a segunda xornada de folga convocada para este martes, o calendario de mobilizacións continuará os días 17, 18, 19, 24, 25, 26 e 27 de xaneiro.