A Xunta solicita prorrogar o pasaporte covid e a limitación de reunións e regulará as festas do Entroido

O Goberno galego quere manter as medidas actualmente vixentes.

Por Europa Press / Redacción | Santiago de Compostela | 12/01/2022 | Actualizada ás 19:50

Comparte esta noticia

A Xunta volverá solicitar ao Tribunal Superior de Xustiza de Galicia (TSXG) manter a obriga de presentar o pasaporte covid para toda a hostalaría, ximnasios, albergues e para acompañantes de pacientes en hospitais, así como para manter a limitación de reunións en espazos públicos e privados --entre as 3 e as 6 horas-- de xoves a domingo.

Un peliqueiro durante a celebración do `Non-Entroido´ na praza da Picota en Laza, a 14 de febreiro de 2021
Un peliqueiro durante a celebración do `Non-Entroido´ na praza da Picota en Laza, a 14 de febreiro de 2021 | Fonte: Rosa Veiga - Europa Press.

Ademais, e coa mirada posta na seguinte data de celebracións prevista, o Entroido, a Xunta disponse a elaborar un protocolo para estas datas, sen que polo momento se ofrezan detalles de en que se basean as liñas estratéxicas.

Tal e como avanzara o presidente da Xunta, Alberto Núñez Feijóo, o Goberno galego quere manter as medidas actualmente vixentes, que entraron en vigor xusto antes de Fin de Ano e que o estarán ata o martes que vén, día 18.

Para iso, necesita a autorización do TSXG, un órgano xudicial que ata agora autorizou as medidas que solicitou a Xunta, pero que ten tamén agora enriba da mesa un recurso de Vox en contra do último decreto de medidas, así como a petición de suspensión cautelar.

Se se prorrogan dúas semanas máis as medidas, isto suporía chegar ao mes de febreiro con estas restricións, tras o avance da variante ómicron. Precisamente, é a finais dese mes cando arrincan os festexos de Entroido este ano, as seguintes datas festivas sinaladas no calendario.

De feito, segundo informou a Consellería de Sanidade, a Dirección Xeral de Saúde Pública comunicou na reunión deste mércores ao subcomité que procederá a elaborar un protocolo para a festividade do Entroido, xa que son "unhas datas nas que adoitan producirse aglomeracións".

Neste Nadal, aínda que non o impuxo, a Xunta recomendou que se suspendesen as cabalgatas tradicionais e substituílas pola presenza estática dos Reis Magos, aínda que varias cidades celebraron igualmente o desfile do Nadal.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta