Feijóo anuncia un comité multidisciplinar para unha estratexia que impulse o rendemento económico e social do AVE
Insiste en que hai que lograr os tempos pactados para Santiago, A Coruña, Pontevedra e Vigo.
Por E.P. | Santiago de Compostela | 14/01/2022 | Actualizada ás 18:39
O presidente do Goberno galego, Alberto Núñez Feijóo, clausurou este venres o Foro AVE Madrid-Ourense, 'Un camiño a Galicia: desafíos e oportunidades", nunha intervención na que anunciou que a creación dun comité multidisciplinar para elaborar unha estratexia coa que impulsar "o maior crecemento económico e rendemento social" da alta velocidade.
"Galicia leva moito tempo traballando e imos seguir facéndoo", dixo o presidente pondo como exemplo as renovacións das liñas de transporte interurbano, o transporte gratuíto para menores de 21 anos dentro da comunidade e o "achegamento entre estación de autobuses e estacións de tren".
Explicou que o comité estará formado por un conxunto de expertos que achegarán propostas para aproveitar a capacidade económica que terá o AVE en Galicia. "A Administración autonómica dedicará o tempo a esta tarefa mentres espera que se complete o traballo planificado na alta velocidade", prometeu.
Respecto deste traballo planificado, demandou os trens de rodamento desplazable insistindo en que "se poña en canto antes ao servizo da comunidade" para cumprir os tempos de viaxe comprometidos: Santiago-Madrid en 2 horas 50 minutos, Pontevedra-Madrid en 3 horas e 10 minutos, Vigo-Madrid en 3 horas e 20 minutos e Coruña-Madrid en 3 horas e 15 minutos.
"Hai que baixar entre 40 minutos" na liña Vigo-Madrid e "30 minutos na de Santiago-Madrid", reclamou Núñez Feijóo dicindo que cos trens Avril lograrían baixar entre 20 e 25 minutos os tempos e "máis aínda se se quitase o transbordo en Ourense".
"Gañariamos tempo e é unha prioridade", dixo instando o Goberno central a que "cumpra os compromisos" e poña en circulación os trens Avril na "contorna de xuño-xullo" para aproveitar "o impacto" do verán.
"Tiñan que chegar no 2020, atrasouse a 2021 e non se puido cumprir, esperamos que cheguen en 2022", solicitou avanzando ademais que na reunión que manterá a próxima semana coa ministra de transportes, en concreto o venres en Santiago de Compostela, realizará está petición.
Feijóo dixo que Ourense ten "os tempos pactados", pero "faltan Santiago, Pontevedra, Vigo e A Coruña". "E para iso necesitamos un tren no que non sexa necesario facer transbordo e poida ir a 300 quilómetros por hora todo o traxecto", insistiu.
