Ratificada polo Tribunal Supremo a relación laboral de 38 bolseiros coa Deputación de Pontevedra
O secretario comarcal de Comisións Obreiras (CC.OO.) en Pontevedra, José Ramón Piñeiro, sostivo que esta nova sentenza demostra "con contundencia e con toda a claridade" que a Deputación utilizou, "de forma fraudulenta", aos bolseiroS.
Por E.P. | PONTEVEDRA | 17/01/2022 | Actualizada ás 16:32
O Tribunal Supremo ratificou o fallo anterior do Tribunal Superior de Xustiza de Galicia (TSXG) no que se establecía, do mesmo xeito que fixese o Xulgado do Social, a existencia dunha relación laboral entre 38 bolseiros e a Deputación de Pontevedra.
O secretario comarcal de Comisións Obreiras (CC.OO.) en Pontevedra, José Ramón Piñeiro, sostivo que esta nova sentenza demostra "con contundencia e con toda a claridade" que a Deputación utilizou, "de forma fraudulenta", aos bolseiros para que "fixesen labores propias de persoal laboral coa intención de abaratar custos de persoal e de realizar pagos de favores".
Piñeiro lembrou que Comisións Obreiras xa advertiu no seu momento ao Goberno Provincial de que "se estaban utilizando aos bolseiros para realizar traballos que correspondían ao persoal laboral" e que, "este sindicato non permitiría esta fraude", algo que foi corroborado pola Inspección de Traballo que cambiou o epígrafe dos bolseiros nas cotizacións á Seguridade Social, pasándoos a persoal laboral.
Deses 200 bolseiros que realizaban prácticas laborais a través da Deputación, "en moitos casos por medo a represalias do Goberno", só un pequeno grupo presentou as denuncias e 38 deles "a pesar de que a Deputación enredou o tema todo o posible", conseguiron que con esta sentenza sexan indefinidos, "sen posibilidade por parte do equipo de Goberno de poder recorrela".
Jose Ramón Piñeiro asegurou que o Supremo dá a razón ás denuncias de Comisións Obreiras e "demostra que o equipo de Goberno está a facer unha política de persoal nefasta e impropia dun goberno socialista, non tendo en conta a legalidade vixente e ignorando a negociación cos representantes do persoal".
Segundo Piñeiro, esta actuación implica un desembolso importante "á parte de ter que crear as prazas destes traballadores". Agora espera que "lle sirva de lección" ao Goberno Provincial para que, a partir de aquí, "cúmprase a legalidade vixente e teñan en conta aos representantes dos traballadores e desta forma non se malgaste o diñeiro dos cidadáns".
