A confianza empresarial cae un 2,9% no primeiro trimestre, por enriba da caída a nivel estatal
A confianza só mellorou nas empresas de 1.000 ou máis asalariados.
Por Europa Press / Redacción | A CORUÑA | 19/01/2022 | Actualizada ás 11:04
O Indicador de Confianza Empresarial Harmonizado (ICEA), cuxa publicación corresponde ao Instituto Nacional de Estatística (INE), baixou un 2,9% en Galicia no primeiro trimestre do ano en relación ao trimestre anterior. A nivel estatal fíxoo un 2,5%.
En todo o Estado e, de acordo cos datos de Estatística, dos cinco sectores económicos analizados, os que máis recortaron a confianza no primeiro trimestre foron transporte e hostalaría (-6,9%) e o comercio (-3,2%), seguidoa da construción (-2,8%), a industria (-1,6%) e outros servizos (-0,9%).
En canto ao tamaño dos establecementos, a confianza só mellorou nas empresas de 1.000 ou máis asalariados, cun repunte do 2,9% respecto ao cuarto trimestre de 2021. Onde máis baixou foi nas empresas de menos de dez asalariados (-3,8%), seguidas das empresas con entre 50 e 199 traballadores (-2,9%); das de 10 a 49 asalariados (-2,6%), e das de 200 a 999 traballadores (-1,5%).
Por comunidades, a confianza empresarial só subiu en Madrid (+3,1%) e Aragón (+2,1%) e baixou no resto, principalmente en Asturias (-9,7%), Baleares (-6,6%), Navarra (-5,6%), Castela e León (-5,5%), Comunidade Valenciana (-4,6%) e Canarias (-4,1%).
