O novo desafío científico que propón Galiciencia tratará de involucrar aos cativos na economía circular
Alumnado de 10 a 18 anos de toda Galicia pode participar no desafío científico 'Atrévete coa Economía Circular!'. O 18 de febreiro remata o prazo para inscribirse no primeiro reto deste desafío.
Por Galicia Confidencial | SANTIAGO DE COMPOSTELA | 24/01/2022 | Actualizada ás 21:30
'Atrévete coa Economía Circular!' é o nome baixo o que a 17ª edición de Galiciencia, a maior feira científica da na nosa comunidade, vén de convocar o seu desafío científico- iniciativa independente do tradicional concurso de proxectos. No desafío científico poderán participar pequenos grupos cun máximo de tres integrantes de entre 10 e 18 anos, aínda que tamén se pode realizar de xeito individual.
'Atrévete coa Economía Circular!' é un desafío que consta de dúas fases, unha online e outra presencial. Para poder superar a primeira fase online cómpre participar nos tres retos que se irán propoñendo ao longo dos vindeiros meses. O prazo de inscrición no primeiro reto, que deberá efectuarse a través da súa páxina web, remata o 18 de febreiro.
Para chegar á fase final, que será presencial durante a celebración de Galiciencia, será imprescindible ter participado nos tres retos online. No desafío final competirán os tres grupos mellor valorados de cada categoría na anterior fase.
A finalidade desta proposta é inculcar no estudantado a idea de que “existe unha forma de producir, de consumir e de organizarnos máis sostible, viable e respectuosa co medio. Nesta liña, a economía circular é un modelo de produción e consumo que implica compartir, arrendar, reutilizar, reparar, renovar e reciclar os materiais e productos existentes durante o maior tempo posible” -destacan desde Galiciencia-.
Galiciencia é a maior feira científica da na nosa comunidade, promovida polo Parque
Tecnolóxico de Galicia -Tecnópole- desde o ano 2006. Busca achegar a ciencia á sociedade, en particular aos estudantes de Primaria, Secundaria, FP e Bacharelato. Desenvólvese en colaboración coa Consellería de Economía, Empresa e Innovación; e co patrocinio da FECYT (Fundación Española para la Ciencia y la Tecnología – Ministerio de Ciencia e Innovación). Esta 17ª edición celebrarase no mes de maio de xeito presencial, coa “Economía Circular” como lema.
