Feijóo quéixase de que o Goberno central siga sen ofrecer unha aclaración sobre a repartición dos fondos europeos

O presidente da Xunta de Galicia, Alberto Núñez Feijóo, queixouse este luns de que, máis dun mes despois, o Goberno siga sen contestar a súa petición de "aclaración" sobre a repartición dos fondos europeos. Segundo subliñou, "é importante saber o que está a pasar" porque non se pode "adxudicar un proxecto antes de abrir o prazo" como, ao seu xuízo, ocorreu en Martorell (Barcelona) cunha fábrica de baterías.

Ante as críticas do Goberno polos recursos ante a Xustiza que prepara o PP polos fondos, Feijóo lembrou que hai máis dun ano Galicia foi a primeira comunidade que recorreu pola falta de pagamento do IVE e entón xa lles dixeron que "non eran leais". "Estivemos durante meses tentando negociar co Goberno para que nos pagase o que nos debía e tiveron que ir ao xulgado", indicou.

Agora, segundo proseguiu, el como presidente da Xunta non quere "ter ningún recurso con ninguén" e "menos" co Executivo porque, aínda que estea ou non de acordo con el, é o Goberno de España. "E sabe mal ademais que un representante do Estado que é un presidente autonómico teña que denunciar a outro goberno que representa ao Estado, que é o Goberno central", resaltou nunha entrevista en LaSexta.

Con todo, dixo que é "moi importante saber o que está a pasar" e citou como exemplo o feito de que hai uns meses o Goberno fose a Martorell e anunciase unha "fábrica de baterías para o sector da automoción, antes de abrir o prazo para presentar as propostas dos distintos construtores de automóbiles de España". "Adxudicar un proxecto antes de abrir o prazo para adxudicar proxectos, é unha cousa, cando menos, moi sorprendente", exclamou.

Da mesma maneira, criticou que o Ministerio de Traballo tomase unha decisión "moi sorprendente" despois de que, de todos os fondos europeos para políticas activas de emprego, o Goberno resérvase o 45% cando a competencia é das comunidades autónomas."Estamos a falar que hai 450 millóns que o Goberno se reservou para si e entendemos que ese diñeiro é das comunidades autónomas por un tema competencial", indicou.

Segundo sinalou, o Goberno xa empezou a executar eses 450 millóns con "9 millóns xa para unhas comunidades autónomas", "todas por certo do mesmo signo" porque no caso de Euskadi o "conselleiro de emprego é do Partido Socialista".

Feijóo explicou que hai máis dun mes que pediron ao Goberno unha "aclaración" e saber "se se vai a quedar co 45% dos fondos de emprego das comunidades" e se "vai repartir eses 450 millóns fóra" da Conferencia Sectorial. "Nin nos contestaron", queixouse.

Ademais, o presidente da Xunta subliñou que hai 16.000 millóns para fondos industriais e trasladáronlles que "toda a política industrial se vai executar desde o Ministerio de Industria", algo que, ao seu xuízo, "non é moi razoable".