Por Galicia Confidencial | SANTIAGO DE COMPOSTELA | 27/01/2022 | Actualizada ás 18:15
As críticas ao xurado do Benidorm Fest que quixo deixar fóra da final a Tanxugueiras para representar o Estado español en Eurovisión non deixan de multiplicarse. De feito, a palabra "tongo" leva todo este xoves como trending topic en Twitter.
A comunidade eurofan que apoia a Aida Tarrío, Sabela e Olaia Maneiro consideran que a decisión tomada polo xurado, moi afastada do amplo apoio que as galegas recibiron a través do voto popular e do panel demoscópico, está empañada por certos favoritismos ou amaños.
Por iso, a raíz desta polémica, veñen de crear unha campaña en Change.org como mostra de apoio a Tanxugueiras e co obxectivo de impulsar o voto en favor delas. "Visto que o xurado do Benidorm fest non quere que nos represente a mellor opción por estar interpretada en galego, imos amosarlles que somos moi fortes, e que as Tanxugueiras son as nosas gañadoras", explican na páxina da campaña. Polo de agora, a petición vai camiño de conseguir as 2.500 firmas.
Tanxugueiras actuaron na primeira semifinal do Benidorm Fest na noite deste mércores e acadaron o segundo posto, só superadas pola proposta de Chanel. Así, o próximo sábado competirán na final do festival para tentar chegar a Eurovisión, que terá lugar no mes de marzo en Turín.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.