Por Europa Press / Redacción | SANTIAGO DE COMPOSTELA | 27/01/2022 | Actualizada ás 18:28
A portavoz nacional do BNG, Ana Pontón, sinalou este xoves que "non se poden perder de vista dous problemas", por unha banda "os 200.000 mozos que se marcharon de Galicia" e "a precariedade do mercado laboral", que "condena ás mulleres e aos máis novos".
Ademais, sinalou as dificultades do acceso á vivenda, tamén como consecuencia dun elevado custo fronte aos salarios, especialmente dos máis novos.
Nunha entrevista na TVG, que recolle o BNG nun comunicado, Pontón apuntou que o contexto actual é o dunha situación "nunca vivida" antes, no que "aprendemos a convivir co virus e iso fai que se recupere a actividade económica".
Respecto da reforma laboral, a dirixente nacionalista incidiu en que coa actual proposta de decreto que cualifica de "decepcionante", despedir "é igual de barato". "E o que pedimos a PSOE e a Podemos é que cumpra o que prometeu á cidadanía, a derrogación íntegra da reforma laboral do PP", reclamou, antes de esixir que "teñen que rectificar e cumprir o seu compromiso coa cidadanía".
Sobre a situación da sanidade, Pontón sinalou que o sistema sanitario público "está a alertar que está ao límite". "A cuestión de fondo é que Feijóo ten unha folla de ruta de recortar a sanidade pública e beneficiar a privada", denunciou, para indicar que "hai que recuperar as xerencias de primaria e acabar coa precariedade laboral".
SANIDADE E VIVENDA
Pontón tamén denunciou que Galicia "está á cola en atención primaria". "Dedicamos o 12 por cento do orzamento e debería ser como mínimo o dobre para incoporar máis médicos e profesionais, como os de fisioterapia".
Sobre a posición do BNG acerca da lei de vivenda, Pontón apuntou que "o que falla é que a competencia en materia de vivenda está transferida ás comunidades autónomas e neste ámbito, Feijóo beneficiou os intereses ao sector da construción".
Así mesmo, referiuse a a proposta de crear unha tarifa eléctrica galega e que "así" os galegos "poidan beneficiarse dunha riqueza eléctrica, como pasa nos países da contorna".
NON Á GUERRA E TANXUGUEIRAS
Sobre a crise de Ucraína, defendeu que o deputado Néstor Rego dixo no Congreso que esta situación "obedecía á política expansionista/imperialista" dos Estados Unidos e que a postura da formación nacionalista é "Non á guerra" e que "o que hai que mobilizar é á diplomacia e non ás tropas".
Doutra banda, e despois da primeira semifinal do festival de Benidorm do que sairá a canción que representará a España no festival de Eurovisión, Pontón destacou o labor por "a normalización da lingua" e polas "mulleres" e subliñou que demostran o "orgullo de ser galego".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.