Por Europa Press / Redacción | VIGO | 30/01/2022 | Actualizada ás 13:07
A Fiscalía pide 12 anos de cárcere para un home acusado de abusar sexualmente de forma continuada dunha nena de 14 anos, á que chegou a deixar embarazada, e que será xulgado este xoves na sección cuarta da Audiencia Provincial de Pontevedra.
Segundo recolle o ministerio público no seu escrito de acusación, o home, de 26 anos no momento dos feitos e de nacionalidade venezolana, citábase desde xullo de 2020 de forma frecuente cunha nena de 14 anos de idade, coa que mantiña relacións sexuais.
Nos primeiros abusos, o acusado non usaba protección, polo que a menor acabou quedándose embarazada, e interrompeu de forma voluntaria a xestación en setembro de 2020. Paralelamente, o acusado mantiña outra relación cunha terceira persoa, maior de idade.
A Fiscalía considérao autor dun delito continuado de abuso sexual sobre menor de 16 anos e pide que sexa condenado a 12 anos de cárcere. Tamén pide a medida de liberdade vixiada, a prohibición de comunicarse ou achegarse á vítima durante 10 anos e que a indemnice en 4.000 euros.
Así mesmo, no seu escrito sinala que procede substituír parcialmente a pena pola medida de expulsión ao seu país, e reclama que, unha vez que se execute esa expulsión, se lle impida regresar a España por un prazo de 10 anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.