Rodríguez Rumbo apela á "integración" tras a vitoria de Bernardo Fernández nas primarias coruñesas

A deputada do PSdeG no Parlamento autonómico Begoña Rodríguez Rumbo apelou a "mirar cara a adiante" unha vez pechado o proceso de renovación interna no Partido Socialista galego coa elección do novo secretario provincial na Coruña, cargo que ocupará o alcalde de Pontedeume, Bernardo Fernández, tras a súa vitoria nas primarias do pasado domingo.

Rodríguez Rumbo, recentemente designada viceportavoz parlamentaria despois dos cambios adoptados tras a chegada á Secretaría Xeral do PSdeG de Valentín González Formoso, considera que é o momento de deixar atrás os debates sobre "proxectos" no partido unha vez concluído o proceso de renovación interna coa elección das secretarías provinciais.

Así se pronunciou tras ser cuestionada polos xornalistas nunha rolda de prensa celebrada este luns na Cámara autonómica, onde enxalzou o sistema de primarias do Partido Socialista, que considera "unha manifestación de democracia interna", aínda que "ás veces se entenda como unha loita interna".

A parlamentaria cre que o resultado das primarias provinciais coruñesas, coa vitoria de Bernardo Fernández fronte á súa compañeira no Grupo Socialista Noa Díaz, é o reflexo do desexo da militancia pero que iso "non quere dicir que se exclúa o proxecto" á candidatura derrotada. Por iso, apelou á integración para poder "mirar cara a adiante" nun partido "no que ninguén sobra" e que aspira a "abrirse" á sociedade.

Así as cousas, cre que a conclusión dos procesos provinciais debería pór fin á confrontación de proxectos, aínda que continúe a "discusión interna de idearios". "Pero o que non se pode é estar a discutir ao proxecto gañador", apostilou.

Luís Álvarez e Begoña Rodríguez Rumbo, na primeira xunta de portavoces do Parlamento de Galicia tras a substitución de Gonzalo Caballero. PSDEG | Fonte: Europa Press