Activos aínda pequenos focos na nave indenciada de Santa Comba, que presenta risco de derrube
Continúa a vixilancia para evitar que os focos de lume se reproduzan.
Por Europa Press / Redacción | VIGO | 08/02/2022 | Actualizada ás 10:52
Efectivos de bombeiros manteñen a vixilancia da nave incendiada nas últimas horas no polígono empresarial de Catro Ventos en Santa Comba, xa que aínda que o lume quedou controlado aínda non se dá por extinguido porque permanecen activos pequenos focos de lume e o teito colapsou, presentando risco de derrube.
Segundo informou o 112 Galicia, os bombeiros do Xallas confirmaron que a nave, dunha empresa de aceites usados, ardeu na súa totalidade e o teito colapsou, o que provoca risco de derrube en moitas das zonas afectadas polas chamas.
Os efectivos de extinción atópanse á espera de que eses pequenos focos terminen de arder para dar por finalizada con seguridade a súa tarefa, e manteñen a vixilancia para evitar que os focos se reproduzan.
Ademais dos bombeiros de Santa Comba e efectivos de Protección Civil, participaron neste operativo os bombeiros de Carballo e de Cee, o GES de Brión, persoal de incendios forestais, axentes da Garda Civil e da Policía Local.
Igualmente, cunha cisterna con capacidade de 25.000 litros de auga, tamén se desprazaron os técnicos do Grupo de Apoio Loxístico (GALI) da Axencia Galega de Emerxencias (AXEGA) co fin de prestar apoio aos profesionais de extinción para atallar o lume o antes posible.
O incendio declarouse a media mañá deste luns e dúas persoas resultaron feridas leves. Trátase de dous homes de 47 anos de idade foron trasladados, respectivamente, ao Hospital Clínico de Santiago e a un centro de Atención Primaria.
