Aterra en Santiago por unha emerxencia médica un avión que cubría a ruta entre París e Guadalupe

Un voo da compañía Corsair entre París e Guadalupe aterrou no mediodía deste martes no aeroporto de Santiago de Compostela debido a unha emerxencia médica dun pasaxeiro.

O avión, un Airbus A-330 que despegou minutos antes das 12,00 horas do aeroporto francés de París-Orly en dirección á comuna de Pointe-à-Pitre (Guadalupe), tivo que cambiar o seu rumbo transcorridas dúas horas de voo para aterrar na terminal compostelá ante a indisposición dun dos pasaxeiros que viaxaban a bordo.

Tras recibir a autorización da torre de control de Lavacolla, a aterraxe produciuse ao redor das 14,00 horas. Na pista agardaba unha dotación de Urxencias Sanitarias 061 para atender ao pasaxeiro.

Unha hora e media despois de tomar terra, o avión despegou da pista compostelá para emprender de novo o seu rumbo en dirección ao país caribeño.