Investigados dous veciños da área da Coruña por presuntas estafas a aseguradoras

Axentes da Garda Civil detiveron a un veciño de Miño e investigado a outro de Culleredo, que teñen relación persoal e profesional entre eles, como presuntos autores de estafas a compañías aseguradoras. Segundo informaron fontes do Instituto Armado, o veciño de Miño é propietario dun taller mecánico de coches situado en Culleredo e, ademais, é xefe do outro investigado nun negocio de hostalaría na Coruña.

Estas persoas declararon ás súas respectivas compañías aseguradoras un accidente por alcance cos seus vehículos na localidade de Miño, sen avisar a ningún corpo policial e asistindo a centros médicos para a súa exploración. Un dos implicados solicitou a baixa médica, situación na que permaneceu durante un ano, á vez que seguía traballando. Entre os dous chegaron a estafar máis de 15.000 euros ás compañías aseguradoras.

Por estes feitos, a Garda Civil detivo ao veciño de Miño e investiga tamén ao de Culleredo, e agradeceu a "excelente colaboración" prestada polas aseguradoras. O detido xunto coas dilixencias instruídas, foi posto a disposición do xulgado de instrución de garda da Coruña.

Dous detidos por presentarse ao exame de recuperación de puntos do carné de conducir finxindo ser outra persoa. GARDA CIVIL