Galicia alíase coa Bretaña francesa para defender intereses pesqueiros comúns

Galicia alíase coa Bretaña francesa para defender intereses pesqueiros comúns. A conselleira do Mar, Rosa Quintana, participou no Foro das Rexións Costeiras, que se celebra en Brest, e visitou o porto local onde mantivo encontros con representantes do sector e autoridades locais.

Eses contactos teñen como obxectivo impulsar a pesca galega, estreitar os seus lazos con esta rexión gala e reforzar a súa posición e a defensa dos seus intereses ante as institucións comunitarias, pois se trata das dúas rexións pesqueiras máis importantes da Unión Europea.

A titular de Mar defendeu a necesidade de avanzar no desenvolvemento da economía azul nas rexións costeiras europeas e pide ao comisario de Medio Ambiente, Océanos e Pesca, Virginijus Sinkevicius, que, nos plans de Bruxelas para impulsar esta actividade, haxa un equilibrio entre as distintas competencias que integran a súa carteira --tanto os aspectos ambientais como os pesqueiros--.

O Executivo galego pon en valor o traballo realizado polos grupos de acción local do sector pesqueiro (GALP) e pola Autoridade Portuaria de Vigo, mentres destaca que Galicia xa traballa na súa estratexia sobre a economía azul

Galicia acollerá a finais de maio un evento no marco da revisión da Política Pesqueira Común para impulsar o papel das rexións costeiras, ao que a conselleira convidou a participar aos presentes no foro co obxectivo de apoiar ao sector pesqueiro europeo

Entre outras cuestións, Rosa Quintana mostrou a preocupación ante as distintas propostas para eliminar ou reducir as bonificacións aos combustibles da frota.