Toén acollerá un centro para lembrar os usos tradicionais do río Miño
O espazo, desenvolto grazas ás achegas da Deputación, podería recuperar as vellas barcas que cruzaban o caudal con fins turísticas.
Por E.P. | SANTIAGO DE COMPOSTELA | 13/02/2022 | Actualizada ás 19:09
O apoio da Deputación de Ourense posibilitou ao Concello de Toén avanzar no proxecto de centro de interpretación Pai Miño a través dunha axuda económica para adquirir a futura sede do proxecto. Trátase dun edificio de 450 metros cadrados situado na parroquia de Puga adquirido polo Goberno municipal en 2021 por 55.000 euros. O alcalde de Toén, Ricardo González, destacou que é unha iniciativa "para render homenaxe ao río máis importante de Galicia e que non tiña un centro que lle fixese xustiza".
O proxecto trátase dun centro de interpretación dos cultivos vitivinícolas na conca do Miño, así como das artes da pesca e biosfera. O alcalde explicou que tamén queren "recuperar as barcas tradicionais que cruzaban o río" así como que nun futuro esperan poder polo "en valor a nivel turístico" volvendo ser "barcas de tránsito".
Ademais, buscan que sexa un lugar pedagóxico e de formación "con varias salas de interpretación" e que nun futuro "poida estar integrado na rede de museos de Ourense e que moitos visitantes poidan coñecer Toén", tal como explicou o rexedor. O presidente da Deputación de Ourense, Manuel Baltar, explica que "este proxecto non é só de Toén, é da provincia, e atrévome a dicir de toda Galicia". Pola súa banda, o alcalde deulle as grazas e explicou que espera que o centro sexa "un punto de encontro".
