A Xunta lamenta que o líder do PSdeG propoña o traslado de Ence de Pontevedra ás Pontes

O vicepresidente da Xunta, Alfonso Rueda, comprendeu que empresarios da zona de Pontevedra defendan ante o Supremo a actual localización de Ence nos terreos de Lourizán, declarada nula por parte da Audiencia Nacional. Así mesmo, ao tempo, lamentou que o secretario xeral do PSdeG, Valentín González Formoso, expoña a posibilidade de que a fábrica se traslade ao concello das Pontes, onde é alcalde, e segundo unhas declaracións ofrecidas ao Diario de Pontevedra publicadas en días pasados.

Rueda destacou que "os empresarios son os que crean traballo e riqueza" e, por tanto, "é o que están a defender, que haxa ese traballo na comarca de Pontevedra" e que "non se perda". "É absolutamente lóxico", remarcou, antes de lembrar que a Xunta puxo enriba da mesa que os terreos se adscribisen ao porto de Marín.

Rueda lamentou que "a día de hoxe" se siga "sen saber nada" da posible localización na comarca de Pontevedra da fábrica, e dirixiuse ao Goberno central en concreto por este motivo para pedirlle "seriedade" ante o "risco para moitos postos de traballo".

Ao fío diso, dixo que é "curioso" como o "máximo responsable dos socialistas de Galicia" está "a actuar como alcalde da súa localidade". "É lexítimo se non fose porque ten unha responsabilidade en toda Galicia e o que está a expor suporía postos de traballo á conta doutros", apuntou, antes de sinalar que "o que hai que cumprir é que eses postos de traballo en Pontevedra sse manteñan, sen prexuízo de que haxa noutros sitios". "Non parece lóxico vestir un santo para desvestir outro", sentenciou.

O Supremo ten pendente de resolver sobre a tramitación dunha decena de recursos de empresas e a propia Autoridade Portuaria --que tamén emitiu o seu informe a prol da adscrición dos terreos ao porto-- contra a resolución da Audiencia Nacional, que emitiu tres sentencias en contra da prórroga concedida polo Goberno de Mariano Rajoy.