A OMS recomenda 7 días de corentena en asintomáticos negativos que contactaran con positivos
Nos lugares onde hai un aumento de casos e os servizos sanitarios están baixo presión, a OMS recoñece que "pode ser necesario axustar as políticas de corentena e rastrexo de contactos".
Por Europa Press / Redacción | MADRID | 17/02/2022 | Actualizada ás 18:25
A Organización Mundial da Saúde (OMS) publicou este xoves unha guía provisional sobre o rastrexo de contactos e a corentena naquelas zonas con niveis extremadamente altos de circulación da variante ómicron da COVID-19.
Nos lugares onde hai un aumento de casos e os servizos sanitarios están baixo presión, a OMS recoñece que "pode ser necesario axustar as políticas de corentena e rastrexo de contactos".
Así, consideran que a corentena pode acurtarse: por exemplo, a 10 días sen unha proba diagnóstica, e a 7 días cun test negativo, sempre que a persoa non desenvolva ningún síntoma. Isto contrasta coa recomendación actual da OMS de 14 días de cuarententa para todos os contactos.
"Cando non é posible realizar probas para acurtar a corentena, pódese utilizar como substituto a ausencia de desenvolvemento de síntomas despois dun certo número de días. Por exemplo, a corentena podería terminarse despois de 10 días sen realizar probas se o contacto non presenta síntomas. O risco de transmisión tras a corentena para 10 días de corentena (baseado en datos anteriores a ómicron) estímase en torno ao 1 por cento, cun límite superior de aproximadamente o 10 por cento", explica a OMS.
Se se acurta o período de corentena, a OMS recomenda que as persoas sigan levando unha máscara médica "ben axustada en todo momento" durante todas as actividades interiores e exteriores nas que poida haber interacción con outras persoas, xunto con outras medidas de prevención e control da infección, como o distanciamento físico, a ventilación adecuada dos espazos interiores e a hixiene das mans, durante o resto dos 14 días.
En calquera caso, o organismo sanitario internacional de Nacións Unidas advirte de que "calquera modificación das políticas de rastrexo de contactos e corentena aumentará o risco de transmisión ulterior e debe sopesarse coa capacidade de atención sanitaria, a inmunidade da poboación e as consideracións socioeconómicas".
