'Ourense Termal', quere transformar o termalismo "un motor económico, turístico e demográfico" da provincia

O delegado do Goberno en Galicia, José Miñones, destacou este venres o apoio do Executivo central ao proxecto 'Ourense Termal', que busca facer do termalismo "un motor económico, turístico e demográfico" da provincia ourensá.

Así o fixo saber no acto de presentación do Plan de Sustentabilidade Turística en Destino 'Ourense Termal', que reuniu no balneario de Laias aos responsables das administracións implicadas no desenvolvemento.

O proxecto disporá de tres millóns de euros destinados a investir en 15 concellos da provincia para crear "produtos turísticos innovadores e sustentables", "crear emprego" e "impulsar" as empresas locais, todo iso durante o próximos tres anos a través do cofinanciamento do Ministerio de Industria Comercio e Turismo, Xunta de Galicia e a Deputación de Ourense.

Miñones sinalou que este proxecto "é ambicioso" e "exemplifica" a colaboración entre administracións "polo interese público" que "contribuirá á modernización" destes destinos, "facéndoos máis sustentables", así como "impulsando" as empresas locais co que "se contribuirá a frear o despoboamento na provincia".

Con este plan tamén apuntou a unha "oportunidade para desestacionalizar" o turismo atraendo "novos segmentos de público" e "articulando unha oferta turística combinada" con outros servizos relacionados co patrimonio natural co enoturismo ou co deporte. Así as cousas, o delegado do Goberno aproveitou a visita para remarcar o impulso do Goberno polo desenvolvemento do turismo sustentable en Ourense con investimentos de 16.2 millóns de euros.

Nesta liña, contou que, ao Plan 'Ourense Termal', súmase o Plan de Sustentabilidade Turística para consolidar o destino da Ribeira Sacra e que beneficiará a 12 concellos da provincia. Ademais, xunto a estes proxectos, o Goberno investirá 14 millóns de euros na recuperación e posta en valor turístico do patrimonio da vila de Monterrei.

Ademais, trasladou que o Ministerio xa abriu unha nova convocatoria ordinaria para financiar plans de Sustentabilidade Turística que conta con 23 millóns de euros e que as entidades locais se poden presentar ata o 31 de marzo.

"POTENCIAL TERMAL"

Pola súa banda, Manuel Baltar afirmou que Ourense "é o territorio con maior potencial termal de Europa" e lembrou que desde o goberno provincial "sempre" se tivo "claro" que se debía traballar nese factor que diferencia á provincia doutros destinos.

"O termalismo é unha cuestión identitaria e un recurso económico que necesita da cooperación nacional, autonómica, provincial e local, un modelo de traballo que nos deu grandes froitos nos últimos tempos", afirmou o presidente da Deputación de Ourense.

Ademais, sinalou que a provincia de Ourense converterase na sede do Observatorio Mundial do Termalismo como consecuencia dun traballo de cooperación internacional que vén realizando hai anos. Tamén indicou que neste 2022 acollerá o Congreso Internacional de Turismo Termal, pois así se decidiu desde a EHTTA, entidade que preside Manuel Baltar, e que, impulsado pola Organización Mundial de Turismo, converterá á provincia de Ourense no epicentro do termalismo a nivel mundial.

O presidente do goberno provincial tamén quixo agradecer ao delegado do Goberno en Galicia a súa "actitude proactiva na procura de acordos de colaboración entre administracións que leven o consenso por bandeira, como se demostra hoxe coa celebración deste acto".

Baltar participa na presentación do congreso 'Encontros Europeos de Termalismo'. DEPUTACIÓN DE OURENSE