Obxectivo de Baltar: converter o Pazo provincial nun "gran hotel balneario"
Un estudo destaca que a calidade das augas termais que hai debaixo do pazo provincial é "óptima".
Por Europa Press / Redacción | SANTIAGO DE COMPOSTELA | 19/02/2022 | Actualizada ás 20:17
O presidente da Deputación de Ourense, Manuel Baltar, recibiu o estudo de captación termal do Pazo provincial que conclúe que a auga obtida reúne as condicións esixidas pola lei autonómica para poder ser declaradas augas termais e mineiro-medicinais.
Segundo trasladou a institución provincial nun comunicado, os resultados conseguíronse a partir do "bombeo constante do pozo de 175 metros de profundidade situado no patio da Deputación durante 48 horas entre o 31 de xaneiro e o 2 de febreiro de 2022".
Ademais, subliñaron que o informe sinala que "o caudal medio obtido durante a proba foi de 2,685 l/s". Trátase dun estudo provisional pero que desde a Deputación consideran "un paso máis" no proxecto impulsado desde a institución para converter o Pazo Provincial nun "gran hotel balneario".
