Por E.P. | SANTIAGO DE COMPOSTELA | 28/02/2022 | Actualizada ás 14:33
Os familiares de vítimas e desaparecidos do 'Villa de Pitanxo' recibiron este luns asesoramento, na Subdelegación do Goberno de Pontevedra, para axilizar os trámites burocráticos en relación ás solicitudes de prestacións.
O delegado do Goberno, José Miñones, trasladoulles ás familias toda a información necesaria para que "desde xa" poidan comezar a realizar os trámites sobre as prestacións ás que teñen dereito. O obxectivo é: "Axilizar a tramitación que se realizará desde os diferentes puntos que temos do Instituto Social da Mariña, non só en Marín, senón en cada unha das poboacións dos desaparecidos".
Segundo trasladou tras a reunión aos medios de comunicación Lucía de Pazo, filla dun dos desaparecidos no naufraxio, o Goberno comprometeuse tamén a "facilitar contacto directo cos responsables de cada área" na que deban solicitar prestacións e mostraron a súa "disposición" a axudarlles en calquera dúbida que teñan respecto da tramitación.
Na reunión deste luns, á que tamén asistiu persoal do Instituto Social da Mariña, da Seguridade Social e do departamento de estranxeiría Policía Nacional, as familias dos falecidos e desaparecidos peruanos tamén pediron asesoramento "sobre todo para axudar a axilizar trámites no seu país natal", indicou o delegado do Goberno. Neste sentido, Miñones comprometeuse a trasladarlle esta petición ao cónsul de Perú.
Ademais, José Miñones tamén explicou que, aínda que a normativa establece 90 días para que os desaparecidos poidan ter certificado de defunción, "axilizouse o proceso e as familias xa poden comezar cos trámites a través da mutua e despois co ISM, que fará o abono correspondente das prestacións".
PROCURA DE EMPRESAS PARA ACCEDER AO BARCO
O delegado do Goberno tamén ratificou que o Executivo central continúa na procura de compañías privadas que dispoñan de medios para poder acceder ao barco. Miñones confirmou que están en contacto con diferentes empresas e barallan diferentes vías de solución están "a trasladarse desde a Mariña Mercante".
Ademais expuxo que lles solicitaron ao Goberno canadense "o mapa meteorolóxico histórico da zona" para coñecer as condicións de "idoneidade" e facer calquera actuación coa "máxima seguridade".
Polo momento, as familias non teñen previsto manter máis reunións coas institucións, mentres agardan a coñecer algo máis da investigación. Neste sentido, José Miñones declarou que se lle trasladará ás familias "todo" o que se vaia "sabendo".
En relación á comisión de investigación, afirmou que xa está pedida toda a información de "localización e posición" e dixo que o "paso seguinte será a toma de declaracións". "Esperemos que sexa esta semana, pero non podemos confirmar a data exacta", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.