85 estudantes fanse cos Premios Fin de Carreira por representar "a excelencia"
Román Rodríguez reivindica o "compromiso firme" da Xunta por un sistema universitario "forte", no que se aposta pola "innovación".
Por E.P. | SANTIAGO DE COMPOSTELA | 01/03/2022 | Actualizada ás 17:16
O conselleiro de Cultura, Educación e Universidade, Román Rodríguez, entregou este martes os premios Fin de Carreira a 85 estudantes de universidades galegas, dos que asegurou que representan "a excelencia das universidades públicas", así como "o futuro de responsabilidade, entrega e colaboración" no que aposta por "camiñar".
O titular de Educación destacou a combinación "de talento, traballo e esforzo" das 85 persoas premiadas, 11 máis que o ano anterior, todas elas estudantes que terminaron as súas titulacións no curso 2019-20 coas máximas cualificacións. Dos premiados 51 (o 60%) son mulleres e os 34 restantes son homes. Por universidades, a de Santiago de Compostela conta con 31 galardoados, a de Vigo con 39 e a da Coruña con 15, segundo informou a Xunta nun comunicado.
Cada un dos galardoados recibiu un premio de 3.500 euros e un diploma acreditativo, o que supón, segundo a Xunta, un recoñecemento institucional e un valor engadido para o seu currículo. O número de galardóns está determinado polo número de persoas graduadas na mesma titulación, explica Educación. Así, aquelas titulacións con ata 199 persoas licenciadas optan a un premio, as que teñan entre 200 e 299 a dous e así sucesivamente.
COLABORACIÓN E DIÁLOGO
No acto, tamén estiveron presentes os reitores da Universidade de Santiago de Compostela, Antonio López; da Universidade da Coruña, Julio Abalde, e da Universidade de Vigo, Manuel Reigosa. Román Rodríguez afirmou que a Xunta ten un "compromiso firme" por un sistema universitario galego "forte e no que se aposta pola innovación, a internacionalización, a investigación e a colaboración co tecido produtivo".
Nesta liña, Rodríguez eloxiou o espírito de colaboración e diálogo mostrado polas tres universidades e que, afirmou, se manifesta en acordos de envergadura como o Plan de Financiamento Universitario 2022-2026 no que se mobilizarán máis de 3.000 millóns de euros nestes cinco anos, a actualización e ampliación de titulacións coa incorporación de disciplinas de futuro como a biotecnoloxía, a intelixencia artificial ou a filoloxía aplicada, ou a aposta por un programa completo de apoio á carreira investigadora.
