A Xunta proclámase "referente anticorrupción" en todo o Estado

O director xeral de Avaliación e Reforma Administrativa, Jesús Oitavén, proclamou que a Xunta de Galicia é un "referente anticorrupción" en España e, neste sentido, defendeu que a propia Administración central o ve así. Así, e ante as acusacións formuladas desde a bancada socialista por parte do deputado Pablo Arangüena, o alto cargo autonómico convidou a buscar a "un só membro" do Goberno que dirixe Alberto Núñez Feijóo que fose condenado por un caso de corrupción. "Seguro que non lle vai a saír ningún, porque non hai ningún", sentenciou, na súa quenda de peche, sen lugar a réplica.

Previamente, o deputado socialista comezou a súa intervención ironizando co "flamante" candidato a presidir o PP, en referencia a Alberto Núñez Feijóo, e censurou que "dea por boas" as palabras da presidenta madrileña, Isabel Díaz Ayuso, sobre o "presunto" cobro de comisións por parte do seu irmán sobre contratacións feitas coa Comunidade de Madrid.

Así, diferenciou da "presunción de inocencia penal" sobre a "inocencia política", que quedou, ao seu xuízo, "esnaquizada e desvirtuada por este caso". "Se o señor Feijóo vai tapar todo isto e botarlle terra encima, inhabilítao se quere combater a corrupción", considerou o parlamentario do PSdeG.

Fronte á intervención do deputado socialista, o director xeral de Avaliación e Reforma Administrativa remarcou que Galicia é a comunidade "con máis medidas" para combater posibles casos de corrupción na administración autonómica. "En España somos un referente, é innegable, porque o di todo o mundo, empezando polo Ministerio", remarcou Oitavén, quen manifestou que non se reformou o código ético porque falta que o Goberno central modifique o marco lexislativo sobre o que se debe rexer.