O Son do Camiño confirma os artistas e datas dun festival con pouca pegada galega
Os abonos poñeranse á venda o 9 de marzo e valerán as entradas das edicións canceladas.
Por Europa Press / Redacción | SANTIAGO DE COMPOSTELA | 02/03/2022 | Actualizada ás 17:16
The Chemical Brothers, Liam Gallagher, Tiësto, C Tangana e Jason Derulo encabezan o cartel do festival O Son do Camiño, que regresa este mes de xuño ao Monte do Gozo de Santiago de Compostela despois de dúas edicións suspendidas pola pandemia. Este xoves foi revelado o cartel da terceira edición do festival, que terá lugar os días 16, 17 e 18 de xuño no renovado recinto da capital galega.
Serán tres xornadas nas que pasarán polos escenarios do Monte do Gozo uns 40 artistas de xéneros que van do rock e o indie --Liam Gallager, Foals ou Editors--, á electrónica --The Chemical Brothers, Justices, Tiësto--, o pop --Jason Derulo, Rigoberta Bandini ou Dani Martín-- e os sons latinos --C Tangana, Anual AA ou Jhay Cortez--.
A organización destaca a participación de propostas galegas, como Sen Senra, Triángulo de Amor Bizarro, Boyanka Kostova ou Guadi Galego; así como outros referentes estatais como Lola Índigo, A MODA, Carolina Durante ou Carlos Sadness. Todo iso na reivindicada como a "edición máis variada" da historia do festival, para o que son válidas as entradas adquiridas para 2020 e 2021, ambas canceladas polo covid. Os abonos sairán á venda o próximo 9 de marzo.
Entre as novidades do Son do Camiño 2022 está a ampliación dun 20% da capacidade no Monte do Gozo, que contará cun novo escenario, o terceiro. A zona de descanso terá 4.000 prazas e o recinto disporá dun plan de transporte e outro de restauración
XOVES: C TANGANA E THE CHEMICAL BROTHERS
Así as cousas, O Son do Camiño xa ten configurado o seu cartel para os tres días que volverán encher de música o Monte do Gozo, aínda que aínda serán anunciadas novas incorporacións á nómina de artistas que visitarán Santiago a mediados do mes de xuño.
O festival arrincará o xoves 16 de xuño, xornada para a que se reservan dous dos pratos fortes do cartel: as actuacións de C Tangana e The Chemical Brothers. Ese día tamén estarán no Monte do Gozo Jhay Cortez, Foals, Kase.O, Jazz Magnetism, Sebastián Yatra, Lola Índigo, Carlos Sadness, Lles Castizos e Gazzi. O acento galego correrá a cargo de Sen Senra, Guadi Galego, The Killer Barbies, Furious Monkey House e Boyanka Kostova.
VENRES: LIAM GALLAGHER, ANUEL AA E JUSTICE
Liam Gallagher, colíder xunto ao seu irmán da lendaria banda de britpop Oasis, é o gran nome do segundo día do festival. Anuel AA, Justice, Anne-Marie, Editors, Duki, Justin Quiles e Timmy Trumpet; conforman a variada oferta no estilístico dun venres 17 infestado de nomes internacionais. Budiño, Dani Fernández, Kings Of The Beach, Tigre y Diamante, Innmir e Wöyza & The Galician Messengers completan o cartel da xornada.
FIN DE FESTA CON TIËSTO E JASON DERULO
O Son do Camiño reserva para o fin de festa as actuacións dalgúns dos grandes nomes do cartel, como o dj e produtor dos Países Baixos Tiësto, o estadounidense Jason Derulo ou Dani Martín, líder do Canto del Loco. Todo iso nunha xornada de clausura que terá como protagonistas a Nathy Peluso, Nicki Nicole, Rigoberta Bandini, La M.O.D.A., Khea, Carolina Durante, Miss Caffeina, Triángulo de Amor Bizarro, Rayden, Pablo Lesuite, Escuchando Elefantes, Cora Velasco e Natalia Ferviú DJ.
