Por E.P. | SANTIAGO DE COMPOSTELA | 03/03/2022 | Actualizada ás 17:14
O deputado do BNG no Congreso, Néstor Rego, denunciou a falta de interese do Executivo estatal para mellorar os servizos ferroviarios en Galicia.
Nun comunicado, o parlamentario lembra que presentou no seu día diferentes iniciativas nas que instaba o Goberno a realizar modificacións dos horarios e servizos que conectan as distintas cidades e poboacións galegas, que se viron afectadas as reducións aplicadas durante a pandemia e de novo pola chegada do AVE Ourense-Madrid.
Segundo Néstor Rego, as respostas do Goberno limítanse, no esencial, a xustificar prezos, horarios e frecuencias inadecuadas, sen vontade explícita de atender ás demandas das persoas usuarias afectadas. "Tan só anuncian a intención de aumentar os servizos entre Santiago de Compostela e Vigo con dous novos trens (un por sentido) de luns a venres", censura.
O deputado do Bloque sostén que desde a redución dos servizos ferroviarios no ano 2020 pola pandemia, as liñas ferroviarias que transcorren por Galicia non pararon de sufrir cambios negativos para facilitar o uso do ferrocarril e para atender as necesidades dos usuarios.
Ademais, sinala que a irrupción do AVE, coa consecuente modificación dos horarios en función da demanda externa dificultou os desprazamentos interiores de traballadores, estudantes e demais usuarios.
O parlamentario, que tamén critica que a liña Avant Ourense Santiago é a máis cara do Estado, censura que as respostas do Goberno céntranse en xustificar que os servizos, frecuencias e prezos son os adecuados para a demanda, "esquecendo o descontento provocado".
"É imprescindible acometer a modernización e mellora da rede e dos servizos, como instrumento fundamental de vertebración territorial, cohesión social, desenvolvemento sustentable e conciliación entre a vida laboral e familiar", sinala.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.