Ucraínos residentes na Coruña envían axuda material e tentan acoller refuxiados: "Tiñamos que facer algo"
Un matrimonio crea unha asociación porque sentiron a "necesidade de facer algo".
Por E.P. | SANTIAGO DE COMPOSTELA | 04/03/2022 | Actualizada ás 21:00
A asociación 'Aga.Ucraina', creada hai poucos días, é o resultado do pulo e o arroxo de Natalia Afonina, ucraína afincada en Oleiros desde fai cinco anos, e o seu marido Antonio, que sentiron a necesidade de "facer algo".
Con familiares e amigos atrapados aínda en Ucraína, este matrimonio, coa axuda doutros ucraínos residentes en Galicia, puxo en marcha unha asociación para enviar axuda material --roupa, alimentos, medicamentos e mesmo chalecos antibalas-- e acoller a refuxiados.
"Foi unha avalancha impresionante de xente de toda Galicia que quere colaborar", agradece Antonio que explica ademais que "ao ser a súa muller ucraína, ter alí ao seu fillo, coñecer a moita xente alí", pensaron en "como podían axudar".
Xunto a outras 15 persoas, a maioría de Ucraína, crearon unha asociación que comezaron a difundir, sobre todo, por redes sociais, onde están a recibir un gran apoio. Ademais de galegos anónimos, Antonio conta que xa son moitos os concellos e entidades que se ofreceron a colaborar con eles.
Entre eles, Afundación --a obra social de Abanca-- que lles ofreceu unha nave de 1.000 metros cadrados no polígono de Pocomaco, onde esperan poder centralizar a axuda que reciben por toda a Comunidade. Alí queren ademais instalar as súas oficinas.
"Acabamos de nacer, non temos infraestrutura nin experiencia, e estamos un pouco saturados. Pero hai que facelo. Todos estamos preocupados, temos familia e amigos alí e sentiamos a necesidade urxente de facer algo", insiste Antonio.
FALTAN EQUIPOS DE PROTECCIÓN MILITAR
En canto á axuda material, para cuxo reparto tamén contan con ofertas de empresas de transporte, no seu Facebook e Instagram publicaron un número de conta para aqueles que prefiran facer doazóns monetarias e un correo electrónico para as familias que se ofrezan a acoller a refuxiados ucraínos.
Antonio destaca tamén que recibiron unha oferta dun fondo americano para a compra de equipamento de protección militar. "Alí hai moita necesidade diso, á poboación civil déronlle armas pero non protección, pero é un tema complicado", recoñece.
O outro vértice no que traballan desde 'Aga.Ucraina' é na procura dun fogar para os refuxiados ucraínos que, nun goteo incesante, chegan a Galicia. "Temos case 50 vivendas, familias que están dispostas a acoller. Tamén familias rusas, porque non é un problema de Rusia, é un problema de Putin", recalca.
UN MILLEIRO DE PRAZAS AUTONÓMICAS PARA REFUXIADOS
Máis aló da disposición da sociedade galega, o presidente da Xunta de Galicia, Alberto Núñez Feijóo, ofreceu este venres ao Goberno central un milleiro de prazas de acollida a refuxiados ucraínos en distintos centros.
Deste algo máis dun milleiro de prazas, 714 proceden de centros da Xunta, 281 achéganas os concellos galegos a través da Federación Galega de Municipios e Provincias (Fegamp) e 139 proceden de entidades sociais. A Xunta xa remitiu estes datos ao Ministerio de Inclusión, Seguridade Social e Migracións, que será o encargado de centralizar a repartición por comunidades.
Estas prazas súmanse ás 432 camas en hospitais no sete áreas sanitarias para acoller a aquela poboación de Ucraína con necesidades de atención sanitaria. Delas, 113 serán para pacientes pediátricos, 15 para nenas e nenos con necesidades de tratamento oncolóxico e o mesmo número para neonatos. Con respecto aos adultos, das 319 prazas dispoñibles para eles, un total de 25 serían para pacientes oncolóxicos en tratamento.
AGRADECIDOS AOS GALEGOS
Respecto ao titular autonómico, Antonio comentou que el e a súa muller recibiron a chamada de Feijóo, que lles transmitiu o seu apoio e, en canto á asociación, "todo o que necesiten". Os responsables da asociación están tamén en contacto coa Dirección xeral de Coperación Exterior, con Inclusión Social; así como con multitude de concellos e entidades.
"Tentaremos canalizar toda a axuda e todas as ofertas de cooperación que recibimos", destaca Natalia Afonina, que recoñece, case entre risas, que "agora traballan todo o día e toda a noite". "Estamos moi agradecidos por todo o apoio, moito", subliña a ucraína, que puxo moita énfase na cantidade de galegos que ofreceron "as súas casas, pisos e mesmo habitacións" para acoller a refuxiados.
"Estamos a esperar a outra familia, unha parella con tres nenos pequeniños aos que xa atopamos aloxamento; o día sete vén outra familia, unha parella coa súa nai e con dous nenos tamén", detalla, asegurando ademais que "están convencidos" de que serán "moitos máis".
